सुर्खेत। डोल्पा जिल्ला कारागारबाट सुरुङ खनेर फरार भएका आठ जना कैदीबन्दीमध्ये थप दुई जना पक्राउ परेका छन्। योसँगै पक्राउ पर्नेको सङ्ख्या चार पुगेको छ भने चार जना अझै फरार रहेका छन्।
बुधबार बिहान ३ बजे डोल्पाको त्रिपुरासुन्दरी नगरपालिका-४ बाट त्रिपुरासुन्दरी नगरपालिका-७ का कालिप्रसाद रोकाय र जाजरकोटको नलगाड नगरपालिका-९ का कपिल परियार पक्राउ परेका हुन्। उनीहरूलाई प्रहरीले नियन्त्रणमा लिएको डोल्पाका प्रमुख जिल्ला अधिकारी जुनु हमालले जानकारी दिइन्।
यसअघि मङ्गलवार रुकुम पश्चिमबाट आठबिसकोट नगरपालिका-१० का रामबहादुर विक र सल्यानको कुमाख गाउँपालिका-५ का रेशम राना पक्राउ परिसकेका छन्।
कारागारबाट फरार भएकाहरूमध्ये अब डोल्पाको त्रिपुरासुन्दरी नगरपालिका-४ का हरिबहादुर बुढा, जाजरकोटको बारेकोट गाउँपालिका-१ का यज्ञ विक तथा रुकुम पश्चिमको आठबिसकोट नगरपालिका-५ का तिलक भण्डारी र वडा नम्बर ३ का आदेश भण्डारी फरार रहेका छन्।
गत कात्तिक १४ गते राति जिल्ला कारागारको भित्री पर्खाल र बाहिरी कम्पाउन्डमा सुरुङ खनेर आठ जना कैदीबन्दी फरार भएका थिए। फरार कैदीहरूको खोजीका लागि प्रहरीले विभिन्न क्षेत्रमा विशेष टोली परिचालन गरी तीव्रता दिएको जनाएको छ।
