इरानले बुधवार देशको एकमात्र नागरिक आणविक ऊर्जा केन्द्र रहेको बुशेहर बन्दरगाह सहरलाई लक्षित गर्दै अमेरिकाले नयाँ आक्रमण गरेको जनाएको छ।
यससँगै अमेरिका र इरानबीच पुनः सुरु भएको सैन्य द्वन्द्व थप चर्किएको छ।
फेब्रुअरीमा सुरु भएको द्वन्द्व अन्त्य गर्ने उद्देश्यले गत महिना अमेरिका र इरानबीच भएको ‘इस्लामाबाद समझदारीपत्र’पछि केही समय शान्ति कायम भएको थियो। तर पछिल्ला दिनमा दुवै पक्षले पुनः एकअर्काका सैन्य तथा रणनीतिक लक्ष्यमा आक्रमण थालेका छन्।
इरानको इस्लामिक रिभोलुसनरी गार्ड कोप्र्स (आईआरजीसी)ले बहराइनस्थित अमेरिकी पाँचौँ नौसैनिक बेडालाई लक्षित गरी आक्रमण गरेको दाबी गरेको छ।
बहराइनले भने आफ्ना सुरक्षाबलले इरानबाट प्रहार गरिएका क्षेप्यास्त्र र ड्रोनहरू निस्तेज पारेको जनाएको छ। यसैबीच, जोर्डनले पनि इरानबाट प्रहार गरिएका तीन वटा क्षेप्यास्त्र खसालेको जनाएको छ।
अमेरिकी राष्ट्रपति डोनाल्ड ट्रम्पले तेहरान वार्ताको टेबलमा नफर्किए आगामी सातादेखि इरानका ऊर्जा पूर्वाधार, विद्युत् केन्द्र र पुलहरूमा थप आक्रमण गर्ने चेतावनी दिएका छन्।
“अर्को साता उनीहरूका लागि अझ कठिन हुनेछ,” ट्रम्पले फक्स न्युजसँगको अन्तर्वार्तामा भने।
यद्यपि दुवै पक्षबीचको मध्यस्थतामार्फत जारी कूटनीतिक प्रयास औपचारिक रूपमा भने समाप्त भएको छैन।
द्वन्द्वको प्रमुख केन्द्र फेरि होर्मुज जलसन्धि बनेको छ। फेब्रुअरी २८ मा अमेरिका र इजरायलले इरानमाथि आक्रमण गरेपछि इरानले जलसन्धिमा नियन्त्रण कडा बनाउँदै पटक-पटक बन्द गर्ने घोषणा गरेको थियो।
अमेरिकाले त्यसको जवाफस्वरूप इरानी बन्दरगाहमाथिको नौसैनिक नाकाबन्दी पुनः लागू गरेको छ। यद्यपि ट्रम्पले होर्मुज हुँदै आवतजावत गर्ने जहाजमाथि प्रस्तावित २० प्रतिशत शुल्क लगाउने योजना भने फिर्ता लिएका छन्।
