काठमाडौँ – कतारको सरकारी स्वामित्वमा रहेको ऊर्जा कम्पनीको एक ट्यांकरमा इरानी मिसाइलद्वारा प्रहार भएको छ ।

कतारको एक इन्धन ट्यांकरलाई निशाना बनाएर इरानबाट तीनवटा क्रुज क्षेप्यास्त्र प्रक्षेपण गरिएको कतारको रक्षा मन्त्रालयद्वारा जारी विज्ञप्तिमा उल्लेख छ । विज्ञप्तिमा भनिएको छ, ‘सेनाले दुई वटा क्रुज क्षेप्यास्त्रलाई रोकेको छ भने तेस्रो क्षेप्यास्त्र कतारको जलक्षेत्रमा कतार इनर्जिनीलाई दिइएको तेल ट्यांकरमा खसेको छ ।’

चालक दलका २१ सदस्य रहेको उक्त ट्यांकरलाई कुनै मानवीय क्षति नपुर्‍याउन सम्बन्धित अधिकारीहरूसँग समन्वय गरिएको रक्षा मन्त्रालयले जनाएको छ ।

इरानको रिभोलुसनरी गाड्र्सले कतारको स्वामित्वमा रहेको ट्यांकर एक्वा–१ लाई आक्रमण गरेको पुष्टि गरेको छ। गाड्र्सले सरकारी टेलिभिजनमार्फत जारी विज्ञप्तिमा जहाज इजरायली भएको र निशाना बनाइएको जनाएको छ।

फेब्रुअरीको अन्त्यदेखि सुरु भएको अमेरिका र इजरायली आक्रमणको जवाफमा खाडी मुलुकहरूले गत महिनादेखि इरानबाट बारम्बार ड्रोन र क्षेप्यास्त्र आक्रमणको सामना गर्नुपरेको छ।

इरानले तेलको धनी खाडी राष्ट्रहरूमा हाइड्रोकार्बन पूर्वाधारहरू र ढुवानीमा प्रयोग हुने जहाजलाई लक्षित गरेको छ । यी निशानाले प्रभावकारी रूपमा रणनीतिक ‘स्ट्रेट अफ हर्मुज’ बन्द गरेको छ । यो क्षेत्रबाट विश्वको करिब २० प्रतिशत इन्धन (तेल) आपूर्ति हुन्छ ।