जनकपुरधाम — मधेस प्रदेश प्रहरी शान्ति सुरक्षा कायम राख्न पूर्ण रूपमा तयारी अवस्थामा रहेको मधेस प्रदेश प्रहरी कार्यालयका डीआईजी थपलियाले बताएका छन्।
प्रदेशमा कुनै पनि किसिमका अवाञ्छित गतिविधि हुन नदिन प्रहरी सतर्क रहेको उल्लेख गर्दै डीआईजी थपलियाले सुरक्षा व्यवस्थालाई थप प्रभावकारी बनाइएको जानकारी दिए। उनले राजनीतिक गतिविधि तथा सम्भावित चुनौतीलाई ध्यानमा राख्दै सुरक्षा योजना तयार गरिएको बताए।
“प्रदेशको शान्ति सुरक्षालाई पहिलो प्राथमिकतामा राखेका छौँ। आवश्यक परे तुरुन्तै परिचालन गर्न सक्ने गरी प्रहरी बललाई तयारी अवस्थामा राखिएको छ,” डीआईजी थपलियाले भने।
उनका अनुसार सीमावर्ती क्षेत्र, मुख्य सहर, संवेदनशील स्थान तथा राजमार्गमा निगरानी बढाइएको छ। साथै नागरिकसँग सहकार्य गर्दै सूचना आदान–प्रदानलाई पनि सुदृढ बनाइएको प्रहरीले जनाएको छ।
प्रदेश प्रहरी कार्यालयले आम नागरिकलाई कुनै पनि शंकास्पद गतिविधि देखिएमा नजिकको प्रहरी कार्यालयमा जानकारी गराउन आग्रह गरेको छ।
