एजेन्सी – फिफा विश्वकप २०२६ को पहिलो सेमिफाइनलमा फ्रान्स र स्पेन आमनेसामने हुँदैछन्।
टेक्सासमा हुने खेलले विश्वकपको पहिलो फाइनलिस्टको टुंगो लगाउनेछ। खेल नेपाली समयअनुसार राति १२:४५ बजे सुरु हुनेछ।
फ्रान्स मोरक्कोलाई पराजित गर्दै लगातार तेस्रो पटक विश्वकपको अन्तिम चारमा पुगेको हो। योसँगै टोलीले ब्राजिल र जर्मनीको लगातार तीन विश्वकप सेमिफाइनल खेलेको कीर्तिमान बराबरी गरेको छ।
डिडिएर डेसच्याम्प्सको टोलीले प्रतियोगितामा प्रति खेल औसत २.७ गोल गरेको छ। अर्जेन्टिनाले मात्र योभन्दा बढी २.८ गोलको औसत कायम गरेको छ। नकआउट चरणमा भने फ्रान्सले अहिलेसम्म कुनै गोल बेहोरेको छैन।
स्पेनका प्रशिक्षक लुइस दे ला फुएन्ते को नेतृत्वमा टोली लगातार ३६ खेलदेखि अपराजित छ। यस अवधिमा स्पेनले २७ जित र ९ बराबरी खेलेको छ।
स्पेनका मिडफिल्डर मिकेल मेरिनोले पोर्चुगल र बेल्जियमविरुद्ध बेन्चबाट मैदान छिरेर निर्णायक गोल गरेका थिए। उनी विश्वकपको दुई फरक नकआउट चरणमा बेन्चबाट आएर विजयी गोल गर्ने पहिलो खेलाडी बनेका छन्।
स्पेन सन् २०१० मा विश्वकप जितेपछि दोस्रो पटक अन्तिम चारमा पुगेको हो। युरोपियन च्याम्पियन स्पेनले दे ला फुएन्तेको नेतृत्वमा फ्रान्ससँग अहिलेसम्म हार बेहोरेको छैन। टोलीले युरो २०२४ र नेसन्स लिग २०२४/२५ को सेमिफाइनलमा पनि फ्रान्सलाई हराएका थिए।
फ्रान्सका कप्तान किलियन एम्बाप्पे प्रतियोगिताभर उत्कृष्ट लयमा छन्। उनले ६ खेलमा ८ गोल र ३ असिस्ट गरेका छन्। योसँगै विश्वकपमा उनको कुल गोल संख्या २० पुगेको छ। जारी विश्वकपमा अर्जेन्टिनाका लियोनेल मेस्सीसँगै सर्वाधिक गोल गर्ने खेलाडी हुन्।
एम्बाप्पेले प्रति ९० मिनेट ३.३ पटक लक्ष्यमा प्रहार गरेका छन्। स्पेनका गोलरक्षक उनाइ सिमोनले आफ्नो ५ क्लिनसिटको कीर्तिमान कायम राख्न एम्बाप्पेलाई रोक्नुपर्ने चुनौती हुनेछ।
स्पेनका युवा स्टार लामिन यामालले भने समूह चरणमा साउदी अरेबियाविरुद्ध गोल गरेयता लगातार ४ खेल गोल गर्न सकेका छैनन्। यद्यपि प्रति ९० मिनेट ५.१ प्रहार गर्दै उनी स्पेनका सबैभन्दा खतरनाक आक्रमणकारी बनेका छन्।
१९ वर्षीय यामालले फ्रान्सविरुद्ध पछिल्ला २ खेलमा ३ गोल गरिसकेका छन्। त्यसैले यो खेल उनीका लागि पुनः चम्किने ठूलो अवसर हुनेछ।
