भरतपुर – विश्वविद्यालय अनुदान आयोग (UGC) नेपालको सहयोग तथा बालकुमारी कलेजको अनुसन्धान व्यवस्थापन इकाइ (RMC) को आयोजनामा तीनदिने लेख लेखन कार्यशाला जेठ १५ देखि १७ गतेसम्म भरतपुर, चितवनमा सफलतापूर्वक सम्पन्न भएको छ।
कार्यशालामा बालकुमारी कलेज, सप्तगण्डकी बहुमुखी क्याम्पस, आरम्भ कलेज, सुनगाभा कलेज तथा सेन्ट्रल कलेजका प्राध्यापक तथा शैक्षिक क्षेत्रका पेशाकर्मीहरूको सहभागिता रहेको थियो। कार्यक्रमले अनुसन्धान लेखन सीप अभिवृद्धि, शैक्षिक सहकार्य प्रवर्द्धन तथा उच्च शिक्षामा अनुसन्धान संस्कृतिको विकास गर्न महत्वपूर्ण भूमिका खेलेको आयोजकले जनाएको छ।
कार्यक्रमको उद्घाटन सत्र बालकुमारी कलेजका प्राचार्य कुलचन्द्र पण्डितको अध्यक्षतामा सम्पन्न भएको थियो। कार्यक्रममा बालबहादुर थापाले सहभागीहरूलाई स्वागत गरेका थिए भने सुरक्ष्या श्रेष्ठले कार्यक्रम सञ्चालन गरेकी थिइन्। सम्पूर्ण कार्यक्रमको व्यवस्थापन अनुसन्धान व्यवस्थापन इकाइ (RMC) ले गरेको थियो।
कार्यशालामा प्रा. डा. धुर्वलाल पाण्डे, प्रा. डा. विजयलाल प्रधान तथा सहप्राध्यापक डा. गोविन्द ढुंगानाले स्रोत व्यक्तिका रूपमा सहजीकरण गरेका थिए। उहाँहरूले शैक्षिक लेखन, अनुसन्धान प्रकाशनका मापदण्ड, शोधपत्र तयारी, विद्वतापूर्ण सञ्चार तथा स्तरीय जर्नलमा प्रकाशनका रणनीतिबारे विस्तृत प्रशिक्षण प्रदान गर्नुभएको थियो।
तालिम अवधिभर सहभागीहरूले व्यावहारिक लेखन अभ्यास, समूह छलफल तथा विभिन्न अभ्यासमूलक क्रियाकलापमा सहभागिता जनाएका थिए। प्रशिक्षणले अनुसन्धानका निष्कर्षलाई प्रकाशनयोग्य लेखमा रूपान्तरण गर्ने तथा शैक्षिक प्रकाशनको गुणस्तर अभिवृद्धि गर्ने विषयमा विशेष जोड दिएको थियो।
सहभागीहरूलाई सम्बोधन गर्दै प्रा. डा. धुर्वलाल पाण्डेले उक्त तालिम प्राध्यापक विकास कार्यक्रमको कार्यादेश (TOR) अनुरूप सञ्चालन गरिएको जानकारी दिनुभयो। उहाँले अनुसन्धान र शैक्षिक लेखनलाई वास्तविक पेशागत विकासको अभिन्न अंगका रूपमा उल्लेख गर्दै यस्ता कार्यक्रमले प्राध्यापकहरूको शैक्षिक दक्षता र पेशागत क्षमता अभिवृद्धिमा महत्वपूर्ण योगदान पुर्याउने बताउनुभयो।
सहभागीहरूले कार्यशालाको व्यावहारिक तथा अन्तरक्रियात्मक स्वरूपको प्रशंसा गर्दै यस तालिमले भविष्यमा अनुसन्धान तथा प्रकाशनसम्बन्धी कार्यमा महत्वपूर्ण सहयोग पुग्ने विश्वास व्यक्त गरेका थिए।
कार्यशालाको समापनसँगै उच्च शिक्षामा अनुसन्धान संस्कृतिलाई थप सुदृढ बनाउने, शैक्षिक उत्कृष्टता प्रवर्द्धन गर्ने तथा प्राध्यापकहरूको निरन्तर पेशागत विकासलाई प्रोत्साहन गर्ने प्रतिबद्धता व्यक्त गरिएको थियो।
