भरतपुर, चितवन – बालकुमारी कलेज, नारायणगढको MBA-FM विभागद्वारा MBA-FM प्रथम सेमेस्टरका विद्यार्थीहरूका लागि “A One-Day Workshop on Seminar in Finance” शीर्षकमा एकदिने शैक्षिक कार्यशाला सम्पन्न गरिएको छ। अनुसन्धानमुखी अध्ययन, शैक्षिक लेखन क्षमता अभिवृद्धि तथा व्यावसायिक दक्षता विकास गर्ने उद्देश्यले आयोजित उक्त कार्यक्रम कलेजको ट्रेनिङ हलमा सम्पन्न भएको हो।
कार्यक्रममा त्रिभुवन विश्वविद्यालयअन्तर्गत जनरल म्यानेजमेन्ट विषय समितिका अध्यक्ष प्रा. डा. ध्रुवलाल पाण्डे प्रमुख स्रोत व्यक्तिका रूपमा सहभागी हुनुहुन्थ्यो। उहाँले वित्त व्यवस्थापन, अनुसन्धान अभिमुखी अध्ययन, सेमिनार पेपर डिजाइन, प्रस्तुतीकरण कला तथा शैक्षिक अनुसन्धानका आधारभूत पक्षबारे विस्तृत प्रशिक्षण प्रदान गर्नुभएको थियो।
कार्यशालामा MBA-FM प्रथम सेमेस्टरका विद्यार्थीहरूलाई अनुसन्धानमूलक अध्ययन पद्धति, विषय छनोट, साहित्य समीक्षा, तथ्याङ्क व्यवस्थापन, अनुसन्धान प्रतिवेदन लेखन तथा प्रभावकारी प्रस्तुतीकरणका विविध आयामबारे व्यवहारिक तथा सैद्धान्तिक ज्ञान प्रदान गरिएको थियो। कार्यक्रममा सहभागी विद्यार्थीहरूले अनुसन्धानमा आधारित अध्ययनले उच्च शिक्षालाई थप गुणस्तरीय र प्रतिस्पर्धी बनाउन महत्वपूर्ण भूमिका खेल्ने बताएका थिए।
प्रमुख वक्ता प्रा. डा. ध्रुवलाल पाण्डेले वर्तमान व्यवस्थापन शिक्षामा अनुसन्धान, विश्लेषणात्मक सोच र शैक्षिक इमानदारीको महत्व दिनप्रतिदिन बढ्दै गएको उल्लेख गर्दै विद्यार्थीहरूलाई अनुसन्धान संस्कृतिको विकासमा सक्रिय हुन आग्रह गर्नुभयो। उहाँले गुणस्तरीय शैक्षिक लेखन र अनुसन्धानले विद्यार्थीहरूको बौद्धिक क्षमता, नेतृत्व विकास तथा व्यावसायिक दक्षता अभिवृद्धिमा महत्वपूर्ण योगदान पुर्याउने धारणा व्यक्त गर्नुभयो।
कार्यक्रममा विद्यार्थीहरूले आफ्ना जिज्ञासा राख्नुका साथै सेमिनार पेपर तयारीका व्यावहारिक चुनौती र समाधानबारे अन्तरक्रियात्मक छलफल गरेका थिए। सहभागीहरूले यस्ता कार्यशालाले अनुसन्धानप्रतिको रुचि अभिवृद्धि गर्नुका साथै भविष्यमा शैक्षिक तथा व्यावसायिक क्षेत्रमा उत्कृष्टता हासिल गर्न प्रेरणा मिल्ने विश्वास व्यक्त गरेका छन्।
बालकुमारी कलेजले अनुसन्धान, नवप्रवर्तन तथा गुणस्तरीय उच्च शिक्षालाई प्राथमिकतामा राख्दै आगामी दिनहरूमा समेत यस्ता शैक्षिक तथा अनुसन्धानमूलक कार्यक्रमहरूलाई निरन्तरता दिने प्रतिबद्धता व्यक्त गरेको छ।
