काठमाडौं। “हाँसो नै उत्तम औषधि हो” भन्ने मूल मर्मका साथ आज विश्वभर ‘विश्व हाँसो दिवस’ मनाइँदैछ। हरेक वर्ष मे महिनाको पहिलो आइतबार मनाइने यो दिवस नेपालमा पनि विभिन्न कार्यक्रमका साथ मनाउन लागिएको हो।
हाँसोका माध्यमबाट मानव स्वास्थ्यमा सुधार ल्याउनुका साथै विश्व शान्ति, भ्रातृत्व र मित्रताको भावना फैलाउने उद्देश्यले यो दिवस मनाउने गरिएको हो।
पछिल्लो समय व्यस्त जीवनशैली र मानसिक तनाव बढिरहेको सन्दर्भमा हाँसोले मानिसमा सकारात्मक ऊर्जा भर्ने र सामाजिक सम्बन्धलाई प्रगाढ बनाउने विश्वास गरिन्छ।
यो दिवसको सुरुवात सन् १९९८ मा भारतका डा. मदन कटारियाले ‘लाफ्टर योग’ अभियानका रूपमा गरेका थिए। अहिले यो दिवसले विश्वव्यापी रूप लिइसकेको छ।
आजको दिन विभिन्न सङ्घसंस्थाहरूले सार्वजनिक स्थलहरूमा भेला भई सामूहिक रूपमा हाँस्ने र खुसी साटासाट गर्ने कार्यक्रमहरू आयोजना गर्दछन्, जसले मानिसहरूलाई तनावमुक्त रहन र स्वस्थ जीवनयापन गर्न प्रेरित गर्दछ।
