धनुषा – प्रहरीको सेवा, सुरक्षा र सुव्यवस्थाको क्षेत्रलाई सशक्त बनाउँदै अगाडि बढ्दै आएकी प्रहरी निरीक्षक (इन्स्पेक्टर) निकिता कुमारी मिश्र लाई उत्कृष्ट कार्य सम्पादन गरेको भन्दै मधेश प्रदेश प्रहरी कार्यालय, जनकपुरधाम द्वारा प्रशंसा पत्र प्रदान गरिएको छ।
प्रहरी निरीक्षक मिश्रले जिल्लामा कानून कार्यान्वयन, शान्ति सुरक्षा कायम, र नागरिकसँगको सम्बन्ध सुधारमा उल्लेखनीय भूमिका निर्वाह गरेकी छन्।
प्रहरी संगठनले सदैव “सेवा नै धर्म हो” भन्ने मूल नारालाई आत्मसात गर्दै सामाजिक सुरक्षा र जनसेवामा निरन्तर क्रियाशील रहँदै आएको छ।
उनले कार्यरत जिल्ला प्रहरी कार्यालय धनुषाको महिला र बालबालिकासम्बन्धी मुद्दाहरूमा विशेष संवेदनशीलता अपनाउँदै समयमै आवश्यक कदम चालेकी छन्।स्थानिय नागरिक र सामुदायिक अगुवाहरूले पनि निरीक्षक मिश्रको नेतृत्वमा प्रहरी–नागरिक सम्बन्ध सुदृढ भएको, सेवा प्रवाह चुस्त भएको र अपराध नियन्त्रणमा दृढ प्रतिबद्धता देखिएको प्रतिक्रिया दिएका छन्।
उनले प्रहरी सेवाभित्र महिलाको सशक्तिकरण, लैङ्गिक समानता र व्यावसायिक दक्षताको उदाहरण प्रस्तुत गर्दै प्रहरी संगठनको विश्वसनीय छविलाई सुदृढ बनाएकी छन्। मधेश प्रदेशमा सुरक्षा, शान्ति र अनुशासन कायम गर्न निरन्तर योगदान दिँदै आएकी उनले आफ्नो जिम्मेवारी पूरा गर्ने क्रममा कहिल्यै पछि नहटेको सहकर्मीहरूले बताएका छन्।
फौजी संगठनमा महिलाको सहभागीता बढ्दै गएको छ। त्यती मात्र होइन उच्च पद तथा नेतृत्वदायी भूमिकामा पुग्ने महिला प्रहरीकाे संख्यामा पनि वृद्धि हुँदै गएकाे छ। अहिले नेपाल प्रहरीका महत्वपूर्ण विभाग, व्युरो, प्रदेश तथा जिल्लाकाे पनि महिला प्रहरीले नेतृत्व गरिरहेका छन् ।
प्रहरी निरीक्षक मिश्रले प्रशंसा पत्र पाउँदा यो आफ्नो मात्र होइन, सम्पूर्ण प्रहरी संगठनको सम्मान भएको बताउँदै भनिन् — “प्रत्येक प्रहरीको लक्ष्य जनताको सेवा गर्नु हो। म यो सम्मानलाई अझै कर्तव्यनिष्ठ र जनमुखी भएर काम गर्न प्रेरणाको रूपमा लिएकी छु।”
धनुषामा हुने विभिन्न अपराधिक घटनाको अनुसन्धान क्रममा धनुषाका प्रहरी प्रमुखहरुले उनलाई कमाण्डर बनाएर पठाउँछन् । महिला भएपछि डराउने प्रकृतिको ठान्ने मानसिकतालाई चुनौति दिँदै ईमान्दारीका साथ ड्युटि गर्ने जो कोही निडर, निर्भिक र साहसीक हुन्छन भन्ने धारणाको उजागरको उदाहरण प्रहरी निरीक्षक निकिता मिश्रलाई श्रेय दिन थालिएको छप्रहरी जवान देखि उपल्लो तहसम्मका व्यक्तिमा बोल्ने शैलीमा सुधार ल्याउन पनि उनी सफल भएका छन ।
मधेश प्रदेश प्रहरीका अनुसार आगामी दिनमा पनि यस्ता उत्कृष्ट प्रहरी अधिकारीहरूको कार्यको मूल्याङ्कन गर्दै संस्थागत रूपमा सम्मान गर्ने नीति अगाडि बढाइएको छ।
नेपाल प्रहरीको यो सम्मानले प्रहरी निरीक्षक निकिता मिश्रजस्ता समर्पित र कर्मनिष्ठ अधिकारीहरूलाई अझै जिम्मेवार र प्रेरित बनाउने विश्वास लिइएको छ।
