काठमाडौं- नेपाली कांग्रेसको १५औँ महाधिवेशनमा कुनै पनि केन्द्रीय पदमा उम्मेदवार भएका व्यक्तिहरू त्यसपछि हुने प्रदेश र जिल्ला कार्यसमितिमा उम्मेदवार बन्न नपाउने भएका छन् । नेपाली कांग्रेसको केन्द्रीय निर्वाचन समितिले प्रेस विज्ञप्ति जारी गर्दै पार्टीको विधानमा रहेको वैधानिक व्यवस्थाप्रति सबैको ध्यान गराएको हो ।
निर्वाचन समितिका सदस्य सचिव राजु कटुवालद्वारा जारी विज्ञप्तिमा नेपाली कांग्रेसको विधान २०१७ (संशोधन सहित) को व्यवस्थाबारे उल्लेख गरिएको छ। विधान अनुसार पार्टीको कुनै तहको अधिवेशनमा प्रतिस्पर्धा गरेको व्यक्ति सोही अवधिमा सो भन्दा माथिल्लो वा तल्लो तहको कुनै पनि कार्यसमितिको पदमा उम्मेदवार हुन पाउने छैनन् । सोही व्यवस्थालाई स्मरण गराउँदै समितिले १५औँ महाधिवेशनका उम्मेदवारहरू प्रदेश र जिल्ला तहमा उठ्न नपाउने जनाएको छ।
यसैगरी, पदेन महाधिवेशन प्रतिनिधि तथा भातृ संघ र शुभेच्छुक संस्थाबाट आएका पदेन प्रतिनिधिहरू महाधिवेशनमा केन्द्रीय कार्यसमितिमा उम्मेदवार बन्न नपाउने वैधानिक व्यवस्था रहेको समेत समितिले विज्ञप्तिमार्फत स्पष्ट पारेको छ।
