काठमाडौं। नवलपरासी (बर्दघाट सुस्तापूर्व) को विनयी त्रिवेणी गाउँपालिका-२ स्थित एस मोडमा पूर्व-पश्चिम राजमार्गमा यात्रुवाहक बस दुर्घटना हुँदा ६ जनाको मृत्यु भएको छ भने १० जना घाइते भएका छन्।
नेपालगञ्जबाट काठमाडौँतर्फ आउँदै गरेको प्रदेश-३-०१-००६ ख १५५३ नम्बरको बस अनियन्त्रित भई सडकबाट नालामा पल्टिँदा उक्त दुर्घटना भएको प्रहरीले जनाएको छ। दुर्घटना हुँदा बसमा चालकसहित जम्मा १८ जना यात्रु सवार थिए।
दुर्घटनामा परी ज्यान गुमाउने ६ जनामध्ये जाजरकोटको भेरीगङ्गा नगरपालिका-३ बस्ने ५० वर्षीय निर्जुङ खत्रीको मात्र सनाखत भएको छ। अन्य मृत पाँच जनाको नाम र ठेगाना अझै खुल्न नसकेको र उनीहरूको पहिचान खुलाउने प्रयास भइरहेको प्रहरीले जनाएको छ।
दुर्घटनामा घाइते भएका १० जनाको स्थानीय स्वास्थ्य संस्था तथा नजिकैका अस्पतालहरूमा उपचार भइरहेको छ।
