चितवन –  रसुवाको भोटेकोशी हुँदै त्रिशूली नदीमा आएको बाढी चितवनको आसपास क्षेत्रमा आइपुगेको छ । बाढी चितवन प्रवेश गरिनसकेको जिल्ला प्रशासन कार्यालय, चितवनका प्रमुख जिल्ला अधिकारी गणेश अर्यालले जानकारी दिएका छन् ।

उनका अनुसार बाढी फिस्लिङ क्षेत्रभन्दा अघिल्लो भागसम्म आइपुगेको जानकारी प्राप्त भएको छ । बाढीको जोखिमलाई मध्यनजर गर्दै प्रशासनले तटीय क्षेत्रका बासिन्दालाई सुरक्षित स्थानमा स्थानान्तरण गर्नुका साथै सावधानी अपनाउन सूचना जारी गरेको छ ।

प्रमुख जिल्ला अधिकारी अर्यालका अनुसार जोखिमयुक्त क्षेत्र पहिचान गरी त्यहाँ बसोबास गर्ने नागरिकलाई सुरक्षित स्थानमा सारिएको छ । बाढीबाट हुन सक्ने जोखिम न्यूनीकरणका लागि सबै सुरक्षा निकायलाई परिचालन गरिएको उनले बताए ।

यस्तै, बाढीको जोखिमलाई मध्यनजर गर्दै सडकमा सवारीसाधनको आवागमन पूर्ण रूपमा रोकिएको छ । स्थानीय तहसँग समन्वय गरी सुरक्षा निकाय परिचालन गरिएको अर्यालले जानकारी दिए ।

‘तटीय क्षेत्रका बासिन्दालाई सुरक्षित स्थानमा सार्ने, सावधानी अपनाउन सूचना सम्प्रेषण गर्ने र सवारीसाधन रोक्ने काम गरेका छौँ,’ उनले भने ।