काठमाडौं- इन्डियन प्रिमियर लिग (आईपीएल) २०२६ को ६१औँ खेलमा आइतबार रोयल च्यालेन्जर्स बेंगलोर (आरसीबी) ले पञ्जाब किंग्स (पीबीकेएस) माथि २३ रनको रोमाञ्चक जित दर्ता गरेको छ । धर्मशालास्थित हिमाचल प्रदेश क्रिकेट एसोसिएसन स्टेडियममा भएको यस प्रतिस्पर्धामा आरसीबीले प्रस्तुत गरेको २२३ रनको विशाल लक्ष्य पछ्याएको पञ्जाब निर्धारित ओभरमा ८ विकेट गुमाउँदै १९९ रनमा समेटियो। यो शानदार जितसँगै बेंगलोर जारी सिजनको प्लेअफमा सुरक्षित रूपमा प्रवेश गरेको छ।
१३ खेलमध्ये ९ मा जित निकाल्दै १८ अङ्कका साथ आरसीबीले आफ्नो बलियो उपस्थिति र प्रदर्शनको निरन्तरतालाई कायम राखेको छ। अर्कोतर्फ, समान १३ खेलमा मात्र ६ जित निकाल्दै १३ अङ्क जोडेको पञ्जाब किंग्स लगातार छैटौँ पराजय भोग्न बाध्य भयो, जसका कारण उसको प्लेअफ यात्रा अब लगभग समाप्त भएको छ।
विशाल लक्ष्य पछ्याउने क्रममा पञ्जाब किंग्सको सुरुवात निकै निराशाजनक रह्यो । टोलीले मात्र १९ रन जोड्दा आफ्ना महत्वपूर्ण ३ विकेट गुमाइसकेको थियो । प्रारम्भिक ब्याटर प्रियांश आर्य शून्य र प्रभसिमरन सिंह मात्र २ रनमा भुवनेश्वर कुमारको शिकार बने भने कप्तान श्रेयस अय्यर पनि १ रनमै रसिक सलाम डारको बलमा पभेलियन फर्किए। त्यसपछि कूपर कोनोली र सूर्यांश शेडगेले चौथो विकेटका लागि ४३ रन जोड्दै इनिङ्स सम्हाल्ने प्रयास गरे। तीन छक्का र तीन चौका प्रहार गर्दै २२ बलमा ३७ रन बनाएका कोनोलीलाई रोमारियो शेफर्डले आउट गर्दै यो साझेदारी तोडे। त्यसै गरी २२ बलमा ३५ रन बनाएका शेडगे पनि स्पिनर सुयश शर्माको फिरकीमा फसे।
मध्यक्रममा मार्कस स्टोइनिस र शशांक सिंहले छैटौँ विकेटका लागि ६७ रनको साझेदारी गर्दै पञ्जाबको जितको आशा जीवित राखेका थिए। स्टोइनिस ३७ रनमा जोश हेजलवुडको शिकार बने। शशांक सिंहले २७ बलमा ४ छक्का र ४ चौकाको मद्दतले ५६ रनको आक्रामक अर्धशतकीय पारी खेले पनि त्यो टोलीलाई जिताउन पर्याप्त भएन। आरसीबीका लागि रसिक सलाम डारले सर्वाधिक तीन विकेट लिए।
