काठमाडौं। पूर्वराजा ज्ञानेन्द्र शाहले यस वर्षको बडादसैँ सादगीपूर्वक मनाउने घोषणा गर्दै सर्वसाधारणलाई टीका नलगाइदिने भएका छन्।
निर्मल निवासस्थित संवाद सचिवालयले आज जारी गरेको सूचना अनुसार भदौमा हिमपहिरोका कारण आएको भीषण बाढी र असोजमा परेको अविरल वर्षाका कारण देशका विभिन्न भागमा ठूलो जनधनको क्षति भएको अवस्थालाई मध्यनजर गर्दै यो निर्णय लिइएको हो।
बाढी र पहिरोका कारण हजारौँ मानिस विस्थापित हुनुका साथै सयौँ नागरिकको ज्यान गएकाले शोक र विषम परिस्थितिमा दसैँ सादगी ढङ्गले मनाउन लागिएको सचिवालयले स्पष्ट पारेको छ।
सचिवालयद्वारा जारी विज्ञप्तिमा धार्मिक आस्था, परम्परागत मान्यता र मर्यादालाई कायम राख्दै यस वर्षको बडादसैँ सादगी रूपमा मात्र मनाइने उल्लेख छ। यसैकारण विजयादशमीका दिन निर्मल निवासमा सर्वसाधारणलाई टीका तथा जमरा लगाइदिने औपचारिक कार्यक्रम यस वर्ष नराखिएको जानकारी गराइएको छ।
