आईसीसी पुरुष क्रिकेट विश्वकप लिग-२ मा अमेरिकाले संयुक्त अरब इमिरेट्स (यूएई) माथि ६ विकेटको शानदार जित निकालेको छ। यूएईले दिएको ३३१ रनको लक्ष्य अमेरिकाले ४८.५ ओभरमा चार विकेट गुमाएर पूरा गर्यो।
अमेरिकाको जितमा मिलिन्द कुमारले उत्कृष्ट ब्याटिङ गर्दै अविजित ११६ रन बनाए। उनले ८४ बलमा सात चौका र पाँच छक्का प्रहार गरे। प्लेयर अफ द म्याच मिलिन्दले आफ्नो टोलीलाई लक्ष्यसम्म पुर्याउन महत्वपूर्ण भूमिका खेले।
अमेरिकाका लागि शुबम रञ्जानेले पनि अविजित ५७ रन बनाए। उनले ४९ बलमा दुई चौका र तीन छक्का प्रहार गरे। यसअघि मोनांक पटेलले ५५ तथा सैतेजा मुक्कामल्लाले ५६ रन बनाए।
यूएईले टस जितेर पहिले ब्याटिङ गर्दै निर्धारित ५० ओभरमा आठ विकेट गुमाएर ३३० रन बनाएको थियो। उसका लागि मुहम्मद शहदादले सर्वाधिक ११४ रन बनाए। उनले १०७ बलमा नौ चौका र तीन छक्का प्रहार गरे।
त्यस्तै तानिश सुरीले ७८ रन तथा अदीब उस्मानीले ३६ रन बनाए। बासिल हमिद २४ रनमा अविजित रहे। अमेरिकाका हार्मित सिंहले चार विकेट लिए भने सौरभ नेत्राभालकर, एहसान आदिल, जसदीप सिंह र शुबम रञ्जानेले समान एक-एक विकेट लिए।
३३१ रनको लक्ष्य पछ्याएको अमेरिकाले सुरुआतमा विकेट गुमाए पनि मिलिन्द र रञ्जानेको उत्कृष्ट साझेदारीमा खेल आफ्नो पक्षमा पार्यो। चौथो विकेटका रूपमा सैतेजा मुक्कामल्ला ५६ रनमा आउट भएपछि क्रिजमा आएका रञ्जानेले मिलिन्दसँग मिलेर अविजित साझेदारी गर्दै अमेरिकालाई जित दिलाए। यस जितसँगै अमेरिका विश्वकप लिग-२ को अंक तालिकाको पहिलो स्थानमा उक्लिएको छ। यूएईले भने राम्रो योगफल बनाए पनि बलिङमा अमेरिकाको मध्यक्रमलाई रोक्न नसक्दा जितबाट वञ्चित भयो। यूएई भने अंक तालिकामा अन्तिम स्थानमा रहेको छ।
