काठमाडौं- नेपालमा सन् २०२६ मा हालसम्म जापानीज इन्सेफलाइटिस (जेई) बाट १३१ जना सङ्क्रमित भएका छन् भने २८ जनाको मृत्यु भएको छ।
स्वास्थ्य तथा जनसङ्ख्या मन्त्रालयअन्तर्गतको परिवार कल्याण महाशाखाका अनुसार हालसम्म एक हजार ३७२ जनामा एक्युट इन्सेफलाइटिस सिन्ड्रोम (एईएस) देखिएकोमा १३१ जनामा जेई पुष्टि भएको हो।
सङ्क्रमितमध्ये ८७ प्रतिशतले जेईविरुद्धको खोप नलगाएको पाइएको छ। हालसम्म ३७ जिल्लाका ९० स्थानीय तहमा जेई सङ्क्रमण पुष्टि भएको महाशाखाले जनाएको छ।
अधिकांश सङ्क्रमित धानखेत तथा सुँगुर फार्म आसपास बसोबास गर्ने र कृषि पेसामा संलग्न रहेको पाइएको छ।
सरकारले प्रभावित जिल्लामा जेईविरुद्धको खोप अभियान सञ्चालन गरिरहेको छ। झापाका सबै स्थानीय तह तथा कैलालीका घोडाघोडी, धनगढी र लम्कीचुहा क्षेत्रमा खोप अभियान जारी छ। अभियानमा ३० वर्ष वा सोभन्दा माथिका व्यक्ति तथा स्वास्थ्यकर्मीलाई लक्षित गरिएको छ।
महाशाखाका अनुसार कैलालीमा एक लाख ११ हजार ७९० र झापामा तीन लाख ४६ हजार ७७७ जनाले जेईविरुद्धको खोप लगाइसकेका छन्। चिकित्सकहरूले जेईबाट बच्न खोप लगाउनुका साथै लामखुट्टेको टोकाइबाट जोगिन आग्रह गरेका छन्।
