वीरगञ्ज – जनताको करबाट चल्ने सरकारी सवारीसाधन जनताको सेवा र सरकारी कामका लागि प्रयोग हुनुपर्ने हो। तर त्यही सरकारी गाडी क्यासिनोको ढोकासम्म पुगेको विषयले पर्सामा अहिले गम्भीर प्रश्न खडा गरेको छ।
सखुवाप्रसौनी गाउँपालिकाका अध्यक्ष जस्वन्त यादवसँग जोडिएको सरकारी गाडी नम्बर ना.१ झ १६८७ वीरगञ्जको गण्डकस्थित क्लार्क रिसोर्ट होटलमा रहेको क्यासिनो परिसरमा भेटिएपछि घटनाले थप गम्भीर रूप लिएको हो।
सरकारी गाडी आखिर क्यासिनोको परिसरमा किन पुग्यो ? कसको प्रयोजनका लागि पुग्यो ? कार्यालयको कामका लागि प्रयोग हुने सवारीसाधन निजी मनोरञ्जन वा अन्य प्रयोजनमा प्रयोग भएको हो भने त्यसको जिम्मेवारी कसले लिने ? अहिले यी प्रश्नको जवाफ खोजिनुपर्ने अवस्था आएको छ।
घटना सामान्य विषय होइन। सरकारी स्रोतसाधनको प्रयोगसँग जोडिएको विषय भएकाले यसले सार्वजनिक पदमा बसेका व्यक्तिको जिम्मेवारी, आचरण र सरकारी सम्पत्तिको उपयोगमाथि नै प्रश्न उठाएको छ। जनप्रतिनिधिले प्रयोग गर्ने सरकारी सवारीसाधन कहाँ, किन र कसरी पुग्यो भन्ने विषय पारदर्शी रूपमा खुल्नु पर्ने आवश्यक छ।
यही विषयमा वडा प्रहरी कार्यालय श्रीपुरको प्रहरी टोलीले सरकारी सवारीसाधनलाई नियन्त्रणमा लिएपछि घटनाले थप चर्चा पाएको हो। अध्यक्ष यादवलाई समेत प्रहरीले नियन्त्रणमा लिएर घटनाबारे आवश्यक अनुसन्धान अघि बढाएको बताइएको छ। तर यहाँ एउटा कुरा स्पष्ट हुन जरुरी छ प्रहरी नियन्त्रणमा पर्नु मात्रै कसैलाई दोषी प्रमाणित गर्नु होइन। सरकारी गाडी क्यासिनो परिसरमा पुग्नुको वास्तविक कारण, त्यसको प्रयोग कसले र कुन प्रयोजनमा गर्यो तथा कानुनी रूपमा कसको जिम्मेवारी बन्छ भन्ने विषय अनुसन्धानबाटै स्पष्ट हुनेछ।
यद्यपि, सार्वजनिक पदमा बसेका व्यक्तिसँग जोडिएको यस्तो घटनाले जवाफदेहिताको प्रश्न भने अवश्य उठाउँछ। सरकारी गाडी निजी प्रयोजनमा प्रयोग भएको हो भने त्यो सार्वजनिक स्रोतको दुरुपयोगको विषय बन्न सक्छ। होइन भने त्यसको स्पष्ट आधार र प्रमाण सम्बन्धित पक्षले दिन सक्नुपर्छ।
यहीँबाट पर्सा प्रहरीको पछिल्लो कार्यशैली पनि चर्चामा आउँछ। जिल्ला प्रहरी कार्यालय पर्साका प्रहरी उपरीक्षक पवनकुमार भट्टराईले पछिल्लो समय संवेदनशील विषयमा प्रहरी संयन्त्रलाई सक्रिय बनाउँदै आएको देखिन्छ। घटनालाई सामान्य रूपमा पन्छाउनेभन्दा पनि सूचना आएपछि प्रहरी परिचालन गर्ने, सवारीसाधन नियन्त्रणमा लिने र अनुसन्धानको प्रक्रियालाई अगाडि बढाउने शैलीले प्रहरीको सक्रियता देखाएको छ।
विशेषगरी एसपी भट्टराई आफैंले संवेदनशील घटनामा चासो दिँदै मातहतका प्रहरीलाई परिचालन गर्ने र घटनाको वास्तविकता बाहिर ल्याउनेतर्फ जोड दिएको प्रहरी स्रोतको भनाइ छ। यही सक्रियताका कारण सरकारी सवारीसाधन क्यासिनो परिसरमा भेटिएको विषय पनि तत्काल प्रहरीको निगरानी र अनुसन्धानको दायरामा आएको हो।
अब प्रश्न केवल एउटा सरकारी गाडी क्यासिनोमा कसरी पुग्यो भन्नेमा सीमित छैन। प्रश्न सरकारी सम्पत्तिको उपयोगप्रति जिम्मेवार को छ भन्ने पनि हो। अनुसन्धानले सत्य बाहिर ल्याउनेछ, तर घटनाले सार्वजनिक पदमा बस्नेहरूलाई एउटा स्पष्ट सन्देश भने दिएको छ—सरकारी स्रोतसाधनको प्रयोगमा प्रश्न उठेपछि त्यसको जवाफ दिनैपर्छ।
र पर्सा प्रहरीका लागि पनि यो घटना अर्को परीक्षा हो कारबाही केवल देखावटी होइन, अनुसन्धानको निष्कर्षसम्म पुग्ने गरी निष्पक्ष र तथ्यमा आधारित हुन्छ कि हुँदैन। एसपी भट्टराईको नेतृत्वमा प्रहरीले अनुसन्धानलाई निष्पक्ष रूपमा अगाडि बढाउन सके यस घटनाले प्रहरीको सक्रियता र जवाफदेहिताको अर्को उदाहरण स्थापित गर्न सक्छ।
