नेपाली कांग्रेसको संस्थापन इतर पक्षले पार्टीको १५औँ महाधिवेशन प्रक्रिया रोक्न माग गर्दै शुक्रबार सर्वोच्च अदालतमा रिट दर्ता गर्ने भएको छ।
महाधिवेशन प्रक्रिया रोक्न निवर्तमान सभापति शेरबहादुर देउवा र निवर्तमान कार्यवाहक सभापति पूर्णबहादुर खड्काले छुट्टाछुट्टै रिट दायर गर्ने तयारी गरेको एक नेताले जानकारी दिए।
कांग्रेस निर्वाचन समितिले १५औँ महाधिवेशन आगामी असोज १६ देखि १९ गतेसम्म काठमाडौंमा गर्ने गरी कार्यतालिका सार्वजनिक गरिसकेको छ। उक्त कार्यतालिका रोक्न माग गर्दै संस्थापन इतर पक्ष सर्वोच्च अदालत जान लागेको हो।
कांग्रेसको आधिकारिकता विवादसम्बन्धी मुद्दामा सर्वोच्च अदालतको पूर्ण इजलासले पुनः सुनुवाइ गर्न निस्सा दिएको छ। उक्त विवादको अन्तिम टुंगो नलागेसम्म महाधिवेशन प्रक्रिया अघि नबढाउन माग गर्दै रिट दर्ता गर्ने तयारी गरिएको हो।
संस्थापन इतर पक्षले आधिकारिकता विवादको निरुपण नभई महाधिवेशन प्रक्रिया अघि बढाउँदा पार्टीको वैधानिकता तथा महाधिवेशनको प्रक्रियामाथि प्रश्न उठ्न सक्ने भन्दै अदालतको हस्तक्षेप माग गर्न लागेको जनाएको छ।
