ललितपुर । महालक्ष्मी नगरपालिका–६ नं. वडा कार्यालय, सिद्धिपुरको आयोजना तथा The Event Lab को सहकार्यमा सम्पन्न नगरस्तरीय फुट्सल प्रतियोगिताको उपाधि इमाडोल युथ क्लब ले जितेको छ। अत्यन्त प्रतिस्पर्धात्मक र रोमाञ्चक फाइनल खेलमा इमाडोल युथ क्लबले टिकेश्वर युवा क्लब लाई २–० गोल अन्तरले पराजित गर्दै नगद रु. ५० हजारसहित ट्रफी, मेडल र प्रमाणपत्र आफ्नो नाममा पार्न सफल भएको हो।
महालक्ष्मी नगरपालिकाकी उपमेयर लक्ष्मी महर्जन ले रेफ्रीलाई बल हस्तान्तरण गर्दै प्रतियोगिताको औपचारिक उद्घाटन गरेकी थिइन्। वडा नं. ६ का वडा अध्यक्ष धर्म महर्जन को सभापतित्वमा सम्पन्न प्रतियोगितामा जनप्रतिनिधि, स्थानीय बुद्धिजीवी, समाजसेवी, खेलप्रेमी तथा ठूलो संख्यामा युवाहरूको सहभागिता रहेको थियो।
प्रतियोगिताभर उत्कृष्ट लयमा देखिएको इमाडोल युथ क्लबले फाइनल खेलमा पनि आफ्नो प्रभावशाली प्रदर्शनलाई निरन्तरता दियो। खेलको सुरुवातदेखि नै बल नियन्त्रणमा राख्दै आक्रामक रणनीति अपनाएको इमाडोलले टिकेश्वर युवा क्लबलाई दबाबमा राखेको थियो। मिडफिल्डमा उत्कृष्ट समन्वय, रक्षापंक्तिको मजबुती र अग्रपंक्तिको तीव्र आक्रमणका कारण टिकेश्वर युवा क्लबले खेलमा लय समात्ने अवसर नै पाएन।
दर्शकहरूले भरिएको खेल मैदानमा दुवै टोलीबीच प्रतिस्पर्धात्मक खेल भए पनि इमाडोल युथ क्लबको आत्मविश्वास, फिटनेस, रणनीतिक खेल र सामूहिक प्रदर्शन स्पष्ट रूपमा उत्कृष्ट देखिएको थियो। दुई सुन्दर गोल गर्दै इमाडोलले खेल आफ्नो पक्षमा पार्दा टिकेश्वर युवा क्लबका प्रयासहरू प्रभावकारी हुन सकेनन्। खेलको अन्तिम सिटी बज्दा इमाडोलका खेलाडी, समर्थक र व्यवस्थापन टोली उत्सवमा रमाइरहेका देखिन्थे।
विजेता टोलीको नेतृत्व अनिल सुवेदी ले गरेका थिए। कप्तान सुवेदीको नेतृत्वमा टोलीले प्रतियोगिताभर अनुशासित, संयमित र परिणाममुखी खेल प्रस्तुत गरेको थियो। टोलीमा गौतम सुवेदी, हरेराम सुवेदी, रबिन केसी, सुबोध केसी तथा दिपेश सुवेदीलगायत खेलाडीहरूको उत्कृष्ट प्रदर्शन रहेको थियो। खेलाडीहरूको आपसी समझदारी, टिमवर्क र जितप्रतिको दृढ इच्छाशक्तिले इमाडोल युथ क्लबलाई उपाधिसम्म पुर्याएको खेल विश्लेषकहरूको भनाइ छ।
व्यक्तिगत विधातर्फ पनि इमाडोल युथ क्लबकै दबदबा कायम रह्यो। हरेराम सुवेदी प्रतियोगिताको बेस्ट गोलकिपर घोषित भए। उनले फाइनलसहित विभिन्न खेलमा विपक्षी टोलीका थुप्रै गोल गर्ने अवसर विफल पार्दै टोलीलाई मजबुत आधार प्रदान गरेका थिए। त्यस्तै नैरिथ्य सुवेदी प्रतियोगिताको हाई स्कोरर बन्न सफल भए। उनको आक्रमणात्मक खेल शैली र निर्णायक गोलहरूले इमाडोलको उपाधि यात्रालाई सहज बनाएको थियो।
टोली व्यवस्थापनतर्फ युमीत सुवेदी र युनिस सुवेदी ले महत्वपूर्ण भूमिका निर्वाह गरेका थिए। खेलाडीहरूको तयारी, समन्वय र व्यवस्थापनमा उनीहरूको योगदान उल्लेखनीय रहेको थियो।
कार्यक्रमलाई सम्बोधन गर्दै उपमेयर लक्ष्मी महर्जनले खेलकुदलाई केवल मनोरञ्जन वा प्रतिस्पर्धाको माध्यमका रूपमा मात्र नभई सामाजिक रूपान्तरणको शक्तिशाली साधनका रूपमा लिनुपर्ने बताइन्। उनले युवाहरूलाई कुलत, हिंसा, दुव्र्यसन र अन्य नकारात्मक गतिविधिबाट जोगाउन खेलकुदको भूमिका अत्यन्त महत्वपूर्ण रहेको धारणा व्यक्त गरिन्।
उनले भनिन्, “आजको युवा पुस्तालाई सही दिशातर्फ डोर्याउन खेलकुद जति प्रभावकारी माध्यम सायदै अर्को हुन सक्छ। खेलले अनुशासन सिकाउँछ, हार स्वीकार्न सिकाउँछ, जितलाई विनम्रतापूर्वक लिन सिकाउँछ र सामूहिक भावनाको विकास गर्छ। स्थानीय सरकारले सडक र भवन मात्र होइन, युवाको भविष्य निर्माण गर्ने वातावरण पनि बनाउनुपर्छ। त्यसैले महालक्ष्मी नगरपालिका खेलकुद विकासलाई प्राथमिकताका साथ अगाडि बढाइरहेको छ।”
त्यसैगरी वडा अध्यक्ष धर्म महर्जनले युवाहरूलाई खेलकुदसँग जोड्न सके समाजका धेरै समस्या स्वतः समाधान हुने विश्वास व्यक्त गरे। उनले खेलकुद क्षेत्रलाई सुदृढ बनाउन वडा कार्यालय प्रतिबद्ध रहेको उल्लेख गर्दै आगामी दिनमा अझ व्यवस्थित, प्रतिस्पर्धात्मक र वृहत् खेलकुद कार्यक्रम सञ्चालन गरिने जानकारी दिए।
उनले भने, “खेलकुद मैदानमा पसिना बगाउने युवा कहिल्यै गलत बाटोमा लाग्दैन। आज समाजले भोगिरहेका धेरै चुनौतीहरूको समाधान युवालाई खेलसँग जोड्नु हो। यही सोचका साथ वडा कार्यालयले खेलकुदलाई प्राथमिकतामा राखेको छ। हामी प्रतिभावान खेलाडीहरूलाई अवसर, प्रोत्साहन र आवश्यक सहयोग उपलब्ध गराउँदै जानेछौं।”
प्रतियोगिताले महालक्ष्मी नगरपालिकाभित्र रहेका प्रतिभावान खेलाडीहरूलाई आफ्नो क्षमता प्रदर्शन गर्ने महत्वपूर्ण अवसर प्रदान गरेको आयोजकहरूको भनाइ छ। खेलकुदप्रतिको बढ्दो आकर्षण, युवाहरूको उत्साहजनक सहभागिता र दर्शकहरूको उल्लेखनीय उपस्थितिले प्रतियोगिता सफल भएको आयोजक पक्षले जनाएको छ।
स्थानीय स्तरबाटै प्रतिभाको खोजी, खेल संस्कृतिको विकास र स्वस्थ समाज निर्माण गर्ने उद्देश्यले आयोजना गरिएको प्रतियोगिताले महालक्ष्मी नगरपालिकाभित्र खेलकुदको भविष्य उज्ज्वल रहेको संकेत दिएको छ। फाइनलमा इमाडोल युथ क्लबले देखाएको प्रदर्शनले उपाधि केवल भाग्यले होइन, निरन्तर मेहनत, अनुशासन, रणनीति र टिमवर्कले जितिन्छ भन्ने सन्देश दिएको छ।
नगरस्तरीय फुट्सल प्रतियोगिताको उपाधिसँगै इमाडोल युथ क्लबले आफूलाई केवल विजेता टोलीका रूपमा मात्र स्थापित गरेको छैन, महालक्ष्मी नगरपालिकाको खेलकुद क्षेत्रमा एउटा बलियो, अनुशासित र उदाहरणीय टोलीका रूपमा समेत परिचित गराएको छ। फाइनलमा देखिएको उनीहरूको आत्मविश्वास, सामूहिक भावना र जित्ने भोकले आगामी दिनमा अझ ठूला प्रतियोगिताहरूमा समेत क्लबले सफलता हासिल गर्ने अपेक्षा बढाएको छ।
