चितवन — आदर्श गृह नेपालले जिल्ला प्रहरी कार्यालय चितवनका प्रमुख प्रहरी उपरीक्षक (एसपी) रामेश्वर पौडेललाई स्वागत तथा सम्मान गरेको छ। गणतन्त्र दिवसको अवसर पारेर शुक्रबार भरतपुर–४ स्थित संस्थाको भवनमा आयोजित कार्यक्रममा नयाँ एसपी पौडेललाई स्वागत तथा सम्मान गरिएको हो।
संस्थाले आयोजना गरेको कार्यक्रममा एसपी पौडेलले यसअघि विभिन्न जिल्लामा रहँदा गरेका कार्यको प्रशंसा गर्दै चितवनमा नयाँ जिम्मेवारीसहित आएको अवसरमा स्वागत गरेको हो । कार्यक्रममा संस्थाका पदाधिकारीहरूले उनलाई खादा र फूलको गुच्छा प्रदान गर्दै सफल कार्यकालको शुभकामना व्यक्त गरेका थिए।
कार्यक्रममा बोल्दै एसपी पौडेलले चितवनको शान्ति सुरक्षा व्यवस्थालाई अझ प्रभावकारी बनाउन समुदायसँग सहकार्य गर्दै अघि बढ्ने प्रतिबद्धता व्यक्त गरे। आदर्श गृहले आफूलाई प्रमुख अतिथिका रूपमा आमन्त्रण गरी सम्मान गरेकोमा धन्यवाद दिँदै उनले संस्थाले समाजमा पुर्याउँदै आएको योगदानबारे आफू पहिलेदेखि नै जानकार रहेको बताए।
उनले महिला तथा बालबालिकाको क्षेत्रमा काम गरिरहेका संस्थाहरूलाई सबै क्षेत्रबाट सहयोग आवश्यक रहेको उल्लेख गर्दै आदर्श गृहले निर्माण गर्न लागेको नयाँ भवनप्रति खुशी व्यक्त गरे। साथै व्यक्तिगत तथा संस्थागत रूपमा निरन्तर सहयोग र साथ रहने प्रतिबद्धता पनि जनाए।
एसपी पौडेलले आदर्श गृहमा आश्रित बालबालिकाले भविष्यमा प्रहरी तथा सरकारी सेवामा जान चाहे आवश्यक मार्गदर्शन र सहयोग उपलब्ध गराउने समेत बताए।
संस्थाकी संस्थापक अध्यक्ष मिना कुमारी खरेलले स्वागत मन्तव्य व्यक्त गर्दै एसपी पौडेललाई सफल कार्यकालको शुभकामना दिइन्। उनले विगतदेखि नै बालबालिकाको क्षेत्रमा काम गर्दै आउँदा प्रहरी प्रशासनको साथ र सहयोगले संस्थालाई यहाँसम्म आइपुग्न सहज भएको बताइन्। आगामी दिनमा पनि सहकार्य र सहयोग निरन्तर रहने विश्वास व्यक्त गर्दै उनले जिल्लाको शान्ति सुरक्षा, सामाजिक सद्भाव तथा अपराध नियन्त्रणमा प्रहरी प्रशासनको भूमिका महत्वपूर्ण रहेको उल्लेख गरिन्।
खरेलले आदर्श गृहले सामाजिक क्षेत्रमा निरन्तर काम गर्दै आएको र आगामी दिनमा सेवा विस्तार गर्ने योजना रहेको जानकारी दिइन्। हालसम्म संस्था भाडाको घरबाट सञ्चालन भइरहेको उल्लेख गर्दै महिला र बालबालिकाका लागि छुट्टाछुट्टै व्यवस्थापन आवश्यक भएकाले भरतपुर महानगरपालिका–१५, विश्वप्रकाश टोलमा ४ कठ्ठा जग्गा खरिद गरी भवन निर्माण कार्य सुरु गरिएको बताइन्। भवन निर्माण सम्पन्न गर्न सबै क्षेत्रबाट सहयोग आवश्यक रहेको उनको भनाइ थियो।
कार्यक्रममा चितवन जिल्ला अदालत बार एसोसिएसनका अध्यक्ष एवं संस्थाका कानुनी सल्लाहकार फुलमाया रानाभाटले आदर्श गृहले धेरै बालबालिकाको उज्ज्वल भविष्य निर्माणमा भूमिका खेलेको बताइन्। उनले यस्ता सामाजिक संस्थालाई सहयोग गर्नु राज्यको दायित्व भए पनि पर्याप्त सहयोग नपुगेको उल्लेख गर्दै सबै पक्षले सहयोग गर्नुपर्ने धारणा राखिन्।
त्यसैगरी वरिष्ठ चिकित्सक डा. केशवराज भुर्तेल, खानेपानी तथा सरसफाई डिभिजन बागमती प्रदेश का पूर्व डी ई प्रमुख हरिराम पौडेल, संस्थाका सल्लाहकार इन्जिनियर भोजराज कौडेल लगायतले आदर्श गृहले गरिरहेको सामाजिक कार्यको प्रशंसा गर्दै आगामी दिनमा सहकार्य गर्दै अघि बढ्ने प्रतिबद्धता व्यक्त गरेका थिए।
कार्यक्रम संस्थाका कार्यबाहक अध्यक्ष हेम माया गौतमको अध्यक्षतामा सम्पन्न भएको थियो भने संस्थाका छोरीहरु द्वारा स्वागत सहित नृत्य प्रस्तुत गरिएको थियो ।
संस्थाका संस्थापक सदस्य एव वर्तमान सचिव अर्जुन अधिकारीले संस्थागत पृष्ठभूमि व्यक्त गर्दै कार्यकमको संयोजन तथा सञ्चालन गरेका थिए भने कार्यक्रममा बालबालिकाको क्षेत्रमा कार्यरत संघसंस्थाका प्रतिनिधि, आदर्श गृहका पदाधिकारी, स्थानीय संघसंस्थाका प्रतिनिधिहरू, जनप्रतिनिधिहरू, टोल विकास संस्थाका प्रतिनिधिहरू, संस्थामा आश्रित संरक्षित महिला तथा बालबालिकाहरु लगाएतको उपस्थिति रहेको थियो।
संस्थाले हालसम्म १ हजार २ सय २६ भन्दा बढी व्यक्तिको उद्धार, १ हजार १ सय ८१ जनाको पारिवारिक पुनर्मिलन तथा २ सय ३४ जनालाई कानुनी न्याय दिलाउन सहयोग गरेको जनाएको छ। हाल संस्थामा ३४ जना आश्रित रहेका छन्।
