दैनिक जिन्दगीमा हामी कैयौँ मानिसहरूलाई भेट्छौँ। कोही हामीलाई देखेर साँच्चै खुसी हुन्छन्, कोही चाहिँ औपचारिकताका लागि वा कुनै उद्देश्यका लागि मुस्कुराउँछन्। यस्तो अवस्थामा, अर्को व्यक्तिको मुस्कान साँचो हो कि केवल नाटक हो भनेर चिन्न अलि गाह्रो हुन सक्छ। तपाईं साँचो र नक्कली मुस्कानबिचको भिन्नता बुझ्न चाहनुहुन्छ भने, यी सरल शारीरिक हाउभाउ उपयोगी साबित हुन सक्छन्: आँखाको भाव आँखाले कहिल्यै झुट बोल्दैन भनेर भनिन्छ।
मुस्कानको कुरा गर्दा यो पूर्ण रूपमा सत्य हो। साँचो मुस्कान ओठमा मात्र सीमित हुँदैन, यो सीधै आँखासम्म पुग्छ। जब कुनै व्यक्ति साँच्चै खुसी भएर मुस्कुराउँछ, उसको आँखाको कुना हल्का खुम्चिन्छ वा चाउरी पर्छ। तर, मुस्कान नक्कली छ भने ओठहरू कानतिर तानिए पनि आँखा पूर्ण रूपमा शान्त र भावहीन रहन्छन्। मुस्कान आउने र हराउने समय वास्तविक मुस्कान बिस्तारै-बिस्तारै अनुहारमा देखा पर्छ र यो गायब पनि बिस्तारै नै हुन्छ। वास्तविक खुसी अनुहारबाट हराउन केही समय लाग्छ।
यसको विपरीत, नक्कली मुस्कान अचानक देखा पर्दछ र कुनै भाव (इमोसन) विना आँखा झिम्काउन नभ्याउँदै गायब भइसक्छ। यो बत्तीको स्विचजस्तै छिट्टै बल्छ र छिट्टै निभ्छ। गालाको अवस्थामा ध्यान दिनुहोस् जब हामी भित्री मनदेखि नै मुस्कुराउँछौँ, हाम्रो अनुहारका मांसपेशीहरूले स्वाभाविक रूपमा काम गर्छन्। यसमा हाम्रो गाला माथितिर उठ्छ र हाम्रा आँखाहरू साना हुन्छन्। तर कसैले जबर्जस्ती मुस्कुराउन खोज्छ भने गालामा कुनै उल्लेखनीय चाल हुँदैन। उनीहरू केवल आफ्नो ओठ फैलाउँछन् र मुस्कुराएको नाटक गर्छन्।
अनुहारको सन्तुलन हाम्रो वास्तविक भावनामा हाम्रो कुनै नियन्त्रण हुँदैन भनेर मनोवैज्ञानिकहरू भन्छन्। साँच्चै मुस्कुराउँदा अनुहारका दुवै भागले एकैसाथ र समान रूपमा प्रतिक्रिया दिन्छन्। यद्यपि, जब मुस्कान नक्कली वा जबर्जस्ती हुन्छ, यो प्रायः अनुहारको एक छेउमा बढी झुकेको वा अनौठो देखिन्छ। यसको मतलब यसरी मुस्कुराउँदा अनुहार थोरै असन्तुलित देखिन्छ।
तल्लो दाँत देखिनु जब कुनै व्यक्ति खुलेर र मनदेखि नै हाँस्छ, उसको माथिल्लो र तल्लो दाँत दुवै प्रायः देखिन्छन्। तर, जब कोही केवल देखावटी रूपमा मुस्कुराइरहेको हुन्छ, उसले प्रायः आफ्नो माथिल्लो दाँत मात्र देखाउँछ वा मुख बन्द गरेर कसिलो मुस्कान दिने प्रयास गर्छ। अर्को पटक जब तपाईं कसैलाई भेट्नुहुन्छ र उनीहरूले तपाईंलाई देखेर मुस्कुराउँछन् भने त्यस्तो बेलामा उनीहरूको ओठ मात्रै ननियाल्नुहोस्, आँखा र अनुहारको भाव पनि पढ्नुहोस्। यी साना कुरामा ध्यान दिएर तपाईंले सजिलैसँग वास्तविक र नक्कली मुस्कानबिचको भिन्नता छुट्याउन सक्नुहुन्छ।
