ललितपुर – देशभर फैलिँदै गएको लागुऔषध दुर्व्यसनको जाल च्यात्न नेपाल प्रहरी अब निर्णायक र आक्रामक रूपमा मैदानमा उत्रिएको छ।
ललितपुरको सिद्धीपुर मा आयोजित एक सशक्त कार्यक्रममा प्रहरीले सीधै विद्यालयमै पुगेर युवापुस्तालाई कडा चेतावनी दिएको छ— “अब ड्रग्ससँग कुनै सम्झौता हुँदैन!”
चैत्र १६ गते बिहान ०९:३० बजेदेखि ११:०० बजेसम्म सञ्चालन गरिएको उक्त कार्यक्रम प्रहरी वृत्त सातदोबाटो को आयोजनामा तथा प्रहरी प्रभाग लुभु को सक्रिय सहभागितामा सम्पन्न भएको हो।
यस अभियानमा विशेष रूपमा स्थानीय सामुदायिक सिकाइ केन्द्र सिद्धीपुर लाई समेत जोड्दै समुदाय र विद्यालय दुवै तहमा सशक्त सन्देश प्रवाह गरिएको छ।
कार्यक्रमको नेतृत्व गर्दै प्रहरी नायब उपरीक्षक पुर्णिमा कुमारी चन्द ले स्पष्ट र कठोर शब्दमा भनिन् “लागुऔषध प्रयोग कुनै व्यक्तिगत गल्ती मात्र होइन, यो समाज र राष्ट्रविरुद्धको अपराध हो। आजको सानो जिज्ञासा भोलिको जीवन विनाश बन्न सक्छ।”
प्रहरी नायब उपरीक्षक पुर्णिमा कुमारी चन्द ले चेतावनी दिइन्
“ड्रग्स प्रयोग गर्नु भनेको आफैंलाई बिस्तारै मार्नु हो। यो कुनै गल्ती होइन, यो जीवन नष्ट गर्ने निर्णय हो।”
उनको सम्बोधन केवल भाषणमा सीमित रहेन, बरु चेतावनी, उदाहरण र यथार्थ घटनाहरूको प्रस्तुतीले विद्यार्थीहरूलाई झस्काउने काम गर्यो। उनले लागूऔषध दुर्व्यसनले कसरी उज्यालो सपना बोकेका युवाहरूलाई अपराध, हिंसा, मानसिक रोग र अन्ततः मृत्युको बाटोतर्फ धकेल्छ भन्ने कठोर यथार्थ उजागर गरिन्।
उनको प्रस्तुति कडा, स्पष्ट र बिना घुमाउरो थियो। उनले लागूऔषधले कसरी युवालाई अपराध, मानसिक विघटन, पारिवारिक पतन र सामाजिक बहिष्कारसम्म पुर्याउँछ भन्ने वास्तविक चित्र कोरेर देखाइन्।
कक्षा ९ र ११ का गरी १५० विद्यार्थीहरूको उपस्थितिमा सम्पन्न कार्यक्रममा लागूऔषधका विभिन्न प्रकार, यसको प्रयोगपछि हुने शारीरिक तथा मानसिक क्षति, पारिवारिक विघटन, सामाजिक अपमान र कडा कानुनी सजायबारे विस्तृत रूपमा जानकारी दिइएको थियो।
प्रहरीले स्पष्ट संकेत दिएको छ— अब लागुऔषधविरुद्धको अभियान केवल औपचारिक कार्यक्रममा सीमित रहने छैन। विद्यालय, टोल, बजार र समुदाय सबै ठाउँमा निगरानी र सचेतना अभियान तीव्र बनाइनेछ। लागूऔषध कारोबार वा प्रयोगमा संलग्न जो–कोहीलाई कानुनअनुसार कडा कारबाही गरिने चेतावनीसमेत दिइएको छ।
कार्यक्रमले विद्यार्थीहरूमा मात्र होइन, सम्पूर्ण समुदायमा नै ठूलो सन्देश प्रवाह गरेको छ— “ड्रग्सबाट टाढा बस्नु विकल्प होइन, बाध्यता हो।”
विशेष रूपमा सामुदायिक सिकाइ केन्द्र सिद्धीपुर लाई जोडेर सञ्चालन गरिएको यस अभियानले विद्यालयबाहिरको समुदायलाई समेत प्रत्यक्ष रूपमा सचेत बनाउने प्रयास गरेको छ। यसले अब लागुऔषधविरुद्धको लडाइँ घर–घर र टोल–टोलसम्म विस्तार हुने संकेत दिएको छ।
अन्त्यमा प्रहरीले अभिभावक, शिक्षक र समाजका सबै पक्षलाई आह्वान गरेको छ— यदि आजैबाट सचेत भइएन भने भोलि अवस्था नियन्त्रण बाहिर जान सक्छ। “अबको पुस्ता जोगाउन आजै कदम चालौं,” भन्ने कडा सन्देशका साथ कार्यक्रम सम्पन्न गरिएको थियो।
