भरतपुर – अर्किड स्कुल भरतपुर–१० ले ११ औं विश्व योग दिवस २०२५ को अवसरमा “सिङ्गो पृथ्वी र मानव स्वास्थ्यका लागि योग” भन्ने नारासहित विद्यालय परिसरमा एक दिने योग शिविर आयोजना गरेको छ।
उक्त योग शिविरमा विद्यालयका कक्षा ६ देखि ९ सम्मका विद्यार्थीहरू तथा शिक्षकहरूको उत्साहजनक सहभागिता रहेको थियो। कार्यक्रमलाई योग प्रशिक्षक श्री पुष्पकुमार श्रेष्ठले सञ्चालन गरेका थिए।
शिविरमा सहभागीहरूले योगासन, प्राणायाम, ध्यान, तथा शारीरिक र मानसिक स्वास्थ्यका लागि उपयोगी योग अभ्यासहरू सिकेका थिए। प्रशिक्षणका क्रममा योगको महत्व, दैनिक जीवनमा यसको प्रयोग र मानसिक सन्तुलनको आवश्यकता विषयमा जानकारी दिइएको थियो।
विद्यालयको अतिरिक्त क्रियाकलाप विभाग प्रमुख अमित भुसालका अनुसार अर्किड स्कुलले हरेक वर्ष विविध स्वास्थ्य तथा वातावरण सम्बन्धी कार्यक्रमहरू सञ्चालन गर्दै आएको छ। “शारीरिक र मानसिक स्वास्थ्य सुदृढ बनाउन योग अत्यन्त प्रभावकारी माध्यम हो,” भुसालले बताए।
कार्यक्रमले विद्यार्थीहरूमा योगप्रतिको जागरूकता बढाउनुका साथै स्वास्थ्यप्रति सचेत बनाउने उद्देश्य पूरा गरेको विश्वास लिइएको छ।
