ठोरी शिकारीबासको बिद्यालयमा प्रअको आर्थिक अनियमितता, गाउँपालिकाले दिएको टिभी नै गायब

ठोरी गाउँपालिका ३ शिकारीबासमा रहेको सरकारी प्राथमिक बिद्यालयमा आर्थिक अनियमितता भएको पाइएको छ । बिद्यालयका प्रधानाध्यापक रामनारायण यादवको लापरबाही तथा गैर जिम्मेवारीका कारण बिद्यालयका लागि प्राप्त भएको विभिन्न शीर्षकको बजेट तथा जिन्सी सामाग्री हरुमा अनियमितता भएको पाइएको हो ।

ठोरी गाउँपालिकाले केही महिना अघि भिजुअल अध्यापन गराउन भनी दिएको टेलीभिजन अहिले सम्म बिद्यालयमा राखिएको छैन । गाउँपालिकाले बिद्यालयलाई दिएको टेलीभिजन बारे ४ महिना बितिसक्दा पनि प्रअ यादवले सोही बिद्यालयका शिक्षक शिक्षिकालाई समेत जानकारी नदिएको सो बिद्यालयकी प्राथमिक शिक्षिका शुशिला अर्यालले बताइन् । यस्तै टेलीभिजन प्राप्त भएको बारे विद्यार्थीका अभिभावकहरु केही थाहा नभएको बताउछन् ।

यस्तै केही महिना अघिदेखि ठोरी गाउँपालिकाले विद्यार्थी हरुका लागि संचालन गरेको दिवा खाजाको लागि खाजा पकाउने सामाग्री तथा थाल बटुका खरीद गर्न भनी उपलब्ध गराएको रकम पनि अनियमित भएको पाइएको छ । गाउँपालिका बाट प्राप्त रु. १० हजार बाट प्रअ यादवले कुनै पनि सामाग्री खरिद गरेका छैनन् । खाजा पकाउनका लागि दशौ बर्ष अघिदेखि बिद्यालयमा रहेको पुरानो कराही र पकाउन दाउरा को प्रयोग गरेको पाइएको छ । यस बारे सो बिद्यालयमा आफ्नो बच्चा पढाई रहेका स्थानीय रमेश थारु भन्छन् “विद्यार्थी हरु पढाई छोडेर दाउरा खोज्न जाने गरेका छ्न, गाउपालिका बाट ग्यास, ग्यास चुल्हो किन्न पैसा आएको छ भन्ने त थाहै छैन ।” अर्का एक अभिभावकले भने ” खाजा खानको लागि बच्चाहरु घर बाट प्लास्टिक, कागज लैजाने गर्छ्न, प्लास्टिक, कागज नलिइ जानेलाई त खाजा पनि दिदैनन् ।”

टेलिभिजन, दिवा खाजा जस्ता गाउँपालिकाका बिशेष कार्यक्रमहरु बाहेक नियमित रुपमा बिद्यालयमा प्राप्त हुने छात्रवृत्तिमा समेत अनियमितता भएको जानकारी प्राप्त भएको छ । बिद्यालयका विद्यार्थीहरुले पाउने छात्रवृत्ति बिद्यालय बाहिरका अर्थात गैर विद्यार्थीलाई समेत दिइएको प्रअ यादव आफैले स्वीकार गरेका छ्न् ।

यसरी एउटा प्राथमिक बिद्यालयलाई गाउपालिका तथा अन्य निकाय बाट प्राप्त सहयोग प्रधानाध्यापक द्वारा अनियमित भएपछि बिद्यालयको अवस्था निम्न बन्दै गएको पाइएको छ । यसबारे आफुले पहिले देखि नै उक्त बिद्यालयका प्रअ लाई चेतावनी दिदै आएको र अहिलेको समस्याको बारेमा पुर्ण रुपमा जानकारी लिइ कारबाहीको दायरामा ल्याइने ठोरी गाउँपालिका वडा नं ३ का वडाध्यक्ष सुर्य लामाले बताए ।

सामुदायिक रेडियो बिजयबस्तीबाट