माडीको बरुवामा हुने स्टार कप फुटबलको खेल तालिका सार्वजनिक

चितवन, भाद्र ६ – माडीको बरुवामा आयोजना हुने स्टार कप फुटबल प्रतियोगिताको खेल तालिका सार्वजनिक भएको छ । सार्वजनिक भएको खेल तालिका अनुसार भोलि (शनिबार) दिउँसो ३ बजे माडी नगरपालिका वडा नं. ६, कल्याणपुर ए र बीरञ्ची युवा क्लबबिच उद्घाटन खेल हुनेछ ।

प्रतियोगितामा माडीभरका २२ वटा टोलीको सहभागिता रहनेछ । बरुवा बजारस्थित स्टार फुटबल चौरमा सञ्चालन हुने सो प्रतियोगिताको उद्घाटन माडीका नगरप्रमुख ठाकुर प्रसाद ढकालले गर्ने कार्यक्रम रहेको छ ।हरेक बर्ष तीज पर्वको अवसरमा स्टार स्पोर्टस् क्लबले स्टार कप फुटबल प्रतियोगिता सञ्चालन गर्दै आएको छ । क्लबको २३औं बार्षिकोत्सव समेतको अवसरमा आयोजना हुने यो प्रतियोगिताको रजत (२५औं) संस्करणको फाइनल भदौ १७ हुने आयोजकले जनाएको छ ।

प्रतियोगिताको बिजेताले नगद रु १ लाख १ हजार १११ सहित शिल्ड मेडल र प्रमाणपत्र प्राप्त गर्नेछ भने दोश्रो पुरस्कार रु. ५० हजार १ सय १५१ प्राप्त गर्ने बताईएको छ । प्रतियोगिताका उत्कृष्ट गोलरक्षक, उत्कृष्ट डिफेन्स, उत्कृष्ट मिडफिल्ड, उत्कृष्ट स्ट्राइकर, उत्कृष्ट खेलाडी, हाइ स्कोरर लगायतका विधागत विजेताहरुलाई पनि पुरस्कारको व्यवस्था रहीको आयोजकले जनाएको छ ।