बैशाख १६,चितवन। राष्ट्रिय सुचना तथा प्रविधी दिवसको अवसर पारी माडीको बसन्तपुरस्थित माडी क्याम्पसमा सुचना प्रविधीको प्रयोग तथा शिक्षण प्रविधी बिषयक सेमीनार कार्यक्रम सम्पन्न भएको छ । कम्प्युटर एसोसिएसन अफ नेपाल क्यान चितवन र माडी नगरपालिकाको संयुक्त आयोजना एवं माडी क्याम्पसको सहयोगमा सो कार्यक्रम सम्पन्न भएको हो ।
कार्यक्रममा माडी नगरपालिका भित्रका विद्यालयका प्रधानाध्यापक, कम्प्युटर फोकल शिक्षक, विद्युत विद्यालय व्यवस्थापन समितिका अध्यक्ष र विद्यार्थीहरुको सहभागिता रहेको थियो । क्यान चितवनका अध्यक्ष भानुभक्त शर्माको अध्यक्षतामा सम्पन्न सो कार्यक्रममा माडी नगरपालिकाका निमित्त प्रमुख प्रशासकीय अधिकृत रविशंकर शाहको प्रमुख आतिथ्यता रहेको थियो । क्यान चितवनका सचिव सन्तोष भुसालले सञ्चालन गर्नु भएको सो कार्यक्रममा माडी क्याम्पसका सहायक क्याम्पस प्रमुख तोयानाथ तिवारी, क्यान प्रदेश नं। ३ का सदस्य लक्ष्मीनारायण तिमिल्सिना, माडीका वडाध्यक्षहरु ईश्वरी प्रसाद ढकाल, पुरन महतो, रामबन्धु पोख्रेल र भरत गुरुङ तथा नगरपालिकाका सुचना प्रविधी अधिकृत प्रविन भण्डारी लगायतको आतिथ्यता रहेको थियो । यसैबीच क्यान चितवनले माडी नगरपालिका र विद्यालयहरुसँग समन्वय गरेर आधारभूत कम्प्युटर सफ्टवेयर तालिम र आधारभूत हार्डवेयर सम्बन्धी तालिम सञ्चालन गर्ने जनाएको छ ।
