काठमाडौं – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेकपा एकीकृत समाजवादीसँग एकताको आधार तय गर्न प्रदेशगत रूपमा छलफल भइरहेको बताएका छन् ।
बुधबार बसेको पदाधिकारी बैठकमा अध्यक्ष प्रचण्डले माओवादी र एकीकृत समाजवादीबीच प्रदेशगत रूपमा सहकार्यका लागि छलफल अगाडि बढाइरहेको बिफ्रिङ गरेका छन् ।
प्रचण्डले आजको बैठकमा वाग्मती र कोसीमा भएको छलफलको बिफ्रिङ गरेका थिए । वाग्मतीभन्दा कोसीमा छलफल सकारात्मक भएको, त्यहाँ सहकार्य अझै बढी सजिलो हुनेबारे बिफ्रिङ गरेको एक नेताले जानकारी दिए । “एकताको आधार तय गर्न छलफल भइरहेको छ । वाग्मतीभन्दा कोसी प्रदेशको छलफल सकारात्मक भएको छ,” बैठकमा प्रचण्डले भने ।
बिहीबार माओवादीको स्थायी कमिटी बैठक बोलाइएको छ । बैठकमा समाजवादी मोर्चा, पार्टी एकता लगायतका विषयलाई एजेन्डा बनाइएको छ ।
प्रचण्डले बैठकमा भने, “शीर्ष तहमा मात्रै एकता भन्ने कुरा गरेर हुँदैन, तल्लो तहबाटै एकताको प्रयास गर्नुपर्छ, त्यसैले सहकार्यका लागि तल्लो तहबाटै छलफल चलाइरहेका छौँ ।”
