बेंसीसहर – लमजुङ प्रहरीले हत्याको आरोपमा एक युवालाई पक्राउ गरेको छ।
पक्राउ पर्नेमा लमजुङको मध्यनेपाल नगरपालिका-८ स्थित मिदिम खोला जलविद्युत् आयोजनामा कार्यरत खोटाङ घर भएका ३० वर्षीय अर्जुन रम्तेल रहेका छन्।
शुक्रबार राति करिब १०:३० बजे सोही जलविद्युत आयोजनामा कार्यरत उदयपुर गाईघाट घर भएका २५ वर्षीय सुनिल श्रेष्ठलाई बायाँ खुट्टाको घुँडामा चुक्कु प्रहार गरी घाइते बनाएका थिए।
गम्भीर घाइते श्रेष्ठलाई उपचारका लागि पोखरा लैजाने क्रममा बाटोमै मृत्यु भएको प्रहरीले जनाएको छ।
शव पोस्टमार्टमका लागि गण्डकी हस्पिटल पोखरामा राखिएको छ। चक्कु प्रहार गर्ने रम्तेललाई कास्की प्रहरीले नियन्त्रणमा लिई थप अनुसन्धानका लागि जिल्ला प्रहरी कार्यालय लमजुङमा पठाएको छ।
घटनाबारे थप अनुसन्धान भइरहेको लमजुङका प्रहरी प्रमुख डीएसपी प्रकाश श्रीमलले जानकारी दिए।
