सिमलढाप – इच्छाकामना गाउँपालिकाको वडा नं.७ ले आफ्नै भवनबाट सेवा थालेको छ । सोमबार गाउँपालिकाका अध्यक्ष दानबहादुर गुरूङ, उपाध्यक्ष माया सिलवाल, प्रमुख प्रशासकीय अधिकृत जगतप्रसाद भुसाल लगायतको उपस्थितिमा वडा कार्यालयको प्रशासनिक भवनको शुभारम्भ गरेपछि वडाको सेवा सोही भवनबाट प्रदान गर्न सुरू भएको हो ।
वडा अध्यक्ष बमबहादुर मगरका अनुसार जिल्ला समन्वय समितिको ३० लाख र पालिकाको ३१ लाख रूपैयाँ गरी ६१ लाख रूपैयाँमा उक्त संरचना निर्माण भएको हो । आर्थिक वर्ष २०७६/०७७ बाट उक्त भवनको निर्माण कार्य सुरू भएको थियो ।
निर्माण कार्य समयमै सम्पन्न भए पनि कार्यालय भवनको उद्घाटनमा भने ढिलो भएको अध्यक्ष मगरले बताए । कार्यालयको उद्घाटन गरेपछि पालिका अध्यक्ष दानबहादुर गुरूङले वडाको सेवालाई अझ सहज र जनमैत्री बनाउन आग्रह गरे ।
इच्छाकामना गाउँपालिकाको भुगोल नै फरक रहेकोले जनताको समस्या र भूगोललाई हेरेर काम गर्नुपर्ने उनले बताए । ‘हामीले कार्यालय समयभित्र मात्रै काम गर्ने भनियो भने जनता सेवाबाट बञ्चित हुन सक्छ,’ उनले भने, ‘त्यसैले आवश्यक पर्दा साँझ–बिहान जतिखेर पनि सेवा दिन सक्नुपर्छ ।’
