काठमाडौं – नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी मंसिर ४ मा हुने निर्वाचनलाई सामान्य रुपमा लिन नहुने बताएका छन्।
प्रेस सेन्टर ललितपुरले प्रकाशन गरेको बेपत्ता पत्रकार मिलन नेपालीको सम्झनाको मिलन स्मारिका विमोचन कार्यक्रमलाई सम्बोधन गर्दै उनले जनयुद्धका उपलब्धि उल्ट्याउन खोज्नेहरुसँगको लडाइँ भएकाले सामान्य रुपमा लिन नहुने बताएका हुन् ।
‘मंसिर ४ गते दुइटा विचार, दुइटा प्रवृत्ति, दुइटा धाराको बीचमा ब्याटल हुँदैछ । यो संविधान र परिवर्तनलाई उल्ट्याउन चाहने र यसलाई रक्षा गर्दै अझ अगाडि बढ्न चाहने दुइटा विचार, दुइटा प्रवृत्ति, दुइटा धारा जे भने पनि दुइटा शक्ति आमनेसामने छन् । हामीले सामान्य निर्वाचनको रुपमा लिनु हुँदैन । त्यो छुट हामीलाई छैन’, उनले भने । उनले गठबन्धन र पार्टीका नेता-कार्यकर्तालाई आआफ्नो ठाउँबाट जनमत बनाउन लाग्न निर्देशनसमेत दिए ।
