टाईगर क्लब गणेशबहादुर स्मृति फुटबलको फाइनलमा, जुगेडीसँग उपाधि भिडन्त

चितवन – टाईगर युथ क्लब पाँचौ स्वर्गीय गणेशबहादुर स्मृति जिल्ला स्तरीय खुल्ला नकआउट फुटबलको फाइनलमा प्रवेश गरेको छ ।

आज (शनिबार) भएको दोस्रो सेमिफाइनल खेलमा सौराहा युवा समाजलाई ३-१ ले हराउँदै टाईगरले फाइनलमा स्थान बनाएको हो । टाईगरको जितमा म्याक्सवेलले २ तथा रोजल दाहालले एक गोल गरे । सौराहाले एक उपहार गोल पायो ।

पहिलो हाफको पाँचौ मिनेटमा नै सौराहाले उपहार गोलबाट खेलमा अग्रता लियो । टाईगरका सरोज तामाङले आत्मघाती गोल गरे । आत्मघाती गोलबाट पछि परेको टाईगरले पहिलो हाफमा नै बराबरी गोल फर्कायो । पहिलो हाफमा थप गरिएको अतिरिक्त समयको चौथो मिनेटमा टाईगरका म्याक्सवेलले बराबरी गोल फर्काए ।

दोस्रो हाफमा टाईगरले २ गोल थप्यो । दोस्रो हाफको आठौं मिनेटमा रोजलले गोल गर्दै टाईगरलाई २-१ लाई अग्रता दिलाए । दोस्रो हाफमा थप गरिएको अतिरिक्त समयको दोस्रो मिनेटमा म्याक्सवेलले व्यक्तिगत दोस्रो गोल गरेपछि टाईगर ३-१ ले विजयी भयो । म्याक्सवेल नै म्यान अफ दि म्याच भए ।

टाईगरले अब उपाधिका लागि आइतबार जु एफसी भरतपुर २९ जुगेडीको सामना गर्नेछ । जुगेडी यस अघि आयोजक नारायणी मोटर्स युनिक क्लब ‘बी’ लाई हराउँदै फाइनलमा प्रवेश गरिसकेको छ ।

भरतपुर ११ कैलाशटोलमा जारी प्रतियोगिताको विजेताले एक लाख २० हजार तथा उपविजेताले ६० हजार प्राप्त गर्नेछन् । सर्वोकृष्ट खेलाडीले पाँच हजार तथा उत्कृष्ट गोलरक्षक, डिफेन्स, स्ट्राईकर, उच्च गोलकर्ता तथा उदयमान खेलाडीले नगद तीन-तीन हजार प्राप्त गर्ने संयोजक निर्मल अंगाईले जानकारी दिए । नारायणी मोटर्स मुख्य प्रायोजक रहेको प्रतियोगिताको सह-प्रायोजकमा सेन्ट्रल कलेज रहेको छ ।