चलचित्र ‘ए मेरो हजुर ४’ को शीर्ष गीत ‘फूलको थुंगा हौ कि’ सार्वजनिक

चितवन – वैशाख १ गते रिलिज हुन लागेको फिल्म ‘ए मेरो हजुर ४’को शीर्ष गीत सार्वजनिक भएको छ । शुक्रबार काठमाडौंको वान सिनेमाजमा आयोजित कार्यक्रममा चलचित्रको शीर्ष गीत सार्वजनिक गरिएको हो ।

गीतमा ‘ए मेरो हजुर’मा समावेश ‘फूलको थुंगा हौ कि’ बोलको हुक लाइन समावेश गरिएको छ । संगीतकार कल्याण सिंहले हुक लाइनसँगै नयाँ संगीत गीतमा प्रयोग गरेका छन् ।रवि मल्लले शब्द कोरेको गीतमा सुगम पोखरेल र अस्मिता अधिकारीको स्वर छ ।

फिल्ममा अनमोल केसी र सुहाना थापालाई रोमान्टिक अवतारमा देखाइएको छ । शे–फोक्सुन्डोको रमणीय दृश्यमा छायांकन गरिएको छ । झरना थापाको निर्देशनमा तयार भएको यो फिल्ममा मित्र डी गुरुङको सम्पादन छ ।