चितवन – नेपालीहरुको महान पर्व बडा दशैं नजिकिँदै छ । दशैं नजिकिए सँगै बजारमा दशैंका गीतहरु सार्वजनिक भइरहेका छन् ।
यसै क्रममा टिम चितवनको प्रस्तुती ‘ह्याप्पी दशैं’ बोलको नयाँ गीत सार्वजनिक भएको छ । उक्त गीत स्माइल नेपाल अनलाइन टिभीको युट्युब च्यानलबाट आज (सोमबार) सार्वजनिक भएको हो ।
सार्वजनिक गीतको शब्द सन्तोष पन्तले लेखेका हुन् भने गीतमा संगीत पनि पन्तले नै भरेका छन् । गीतमा राजु ढकाल, देवी घर्ती मगर, रविन लामिछाने र दोहोरी च्याम्पियनको उत्कृष्ट ८ मा पर्न सफल गायिका अस्मिता डल्लाकोटीको आवाज रहेको छ । गीतमा संगीत संयोजन चेतन गोतामेको छ ।
गीतको भिडियो मदन खड्काले निर्देशन गरेका हुन् । भिडियोमा सन्तोष पन्त, सुष्मा ढकाल, फिलिप देवकोटा, अस्मिता डल्लाकोटी र टिम चितवनका सदस्यहरुको अभिनय छ । बिरेन्द्र भट्टले छाँयाकन गरेको भिडियोलाई अविनास डिसीले सम्पादन गरेका हुन् ।
गीतमा एक आपसमा माया र सदभाव साटेर दशैं मनाऔं भन्ने सन्देश छ । स्वदेश तथा बिदेशका बिभिन्न कुनामा पुगेका नेपालीहरु दशैं मनाउन भने गाउँ घर नै फर्किन्छन् भन्ने कथालाई पनि गीतमा देखाइएको छ ।
गीतका रचनाकार तथा संगीतकार सन्तोष पन्तले पहिलो प्रयासलाई दर्शक स्रोताले मन पराउने विश्वास व्यक्त गरेका छन् । पन्तको यो पहिलो गीत हो । उनले यो गीत सँगै सांगितिक क्षेत्रमा पहिलो पाइला चालेको भन्दै सबैबाट साथ, सहयोग र मायाको अपेक्षा रहेको समेत बताएका छन् ।
