मृतावस्थामा फेला परे साधु

कञ्चनपुर – बेदकोट नगरपालिका–४ स्थित पर्यटकीय क्षेत्र लिंगामा बस्दै आएका अन्दाजी ७५ वर्षीय साधु किसननाथ आज मृतावस्थामा फेला परेका छन् ।स्थानीय बासिन्दाले प्रहरीलाई सो सम्बन्धमा खबर गरेका थिए । मृत्युको कारणबारे अनुसन्धान भइरहेको जिल्ला प्रहरी कार्यालय कञ्चनपुरका प्रहरी नायब उपरीक्षक सिद्धराज न्यौपानेले बताए ।

“मृतकको शरीरको बाह्य क्षेत्रमा कुनै किसिमको चोटपटक लागेको छैन,” उनले भने, “हिजो बिरामी भएर उपचारका लागि गएको भन्ने बुझिएको छ । बिरामी परेर वा अन्य के कारणले मृत्यु भएको हो, त्यसबारे अनुसन्धान भइरहेको छ ।”साधु गिरी लिंगा क्षेत्रमा विगत चार वर्षदेखि बस्दै आएको बताइएको छ । रासस