चितवन – चितवनको रत्नननगर नगरपालिकास्थित सौराहा क्षेत्रमा बाढी पसेको छ । लगातारको वर्षाले पूर्वी चितवनका नदीहरुमा आएको बाढी पर्यटकीय नगरी सौराहामा पसेको हो ।
बुढी राप्ती र राप्ती नदीमा आएको बाढी सौराहा क्षेत्रमा पसेको रेष्टुरेन्ट एण्ड बार एसोसिएसन (रेबान) सौराहाका अध्यक्ष दीपेन्द्र खतिवडाले जानकारी दिए । बाढीले रिभर साइड नजिकका होटल तथा रेष्टुरेन्टहरु डुबानमा परेका छन् ।
बाढी बढ्दो क्रममा रहेकोले थप क्षेत्र डुबानमा पर्न सक्ने खतिवडाले बताए । नदीमा आएको बाढी जमिनको सतहभन्दा १ फिट माथिसम्म पुगिसकेको छ ।
सौराहामा बाढी पस्न थालेपछि होटल तथा रेष्टुरेन्ट व्यवसायीहरुले सामान सुरक्षित स्थानमा सार्न थालेका छन् । लगातार वर्षा हुन थालेपछि बुधवार नै व्यवसायीहरुलाई होटल तथा रेष्टुरेन्टका सामानहरु सुरक्षित स्थानमा सार्न आग्रह गरिएको खतिवडाले बताए ।
उनका अनुसार अधिकाशं व्यवसायीहरुले सामान सुरक्षित स्थानमा सारिसकेका छन् । बाँकी केही व्यवसायीहरुले अहिले सामान सारिरहेका छन् ।
