त्रिदेशीय फुटबल जित्ने खेलाडीलाई सरकारले जनही ४ लाख दिने

काठमाडौं – त्रिदेशीय कप फुटबलका विजेता खेलाडीलाई सरकारले जनही ४ लाख रुपैयाँ दिने भएको छ। शुक्रबार बिहान बसेको मन्त्रिपरिषद्को बैठकले विजेता खेलाडीलाई जनही ४–४ लाख रुपैयाँ दिने निर्णय गरेको परराष्ट्रमन्त्री प्रदीपकुमार ज्ञवालीले जानकारी दिए।

त्रिपुरेश्वरस्थित दशरथ रंगशालामा सोमबार भएको फाइनल खेलमा नेपालले बंगलादेशलाई २–१ गोल अन्तरले पराजित गर्दै त्रिदेशीय कप फुटबलको उपाधि जितेको थियो। नेपालका लागि सन्जोग राई र विशाल राईले गोल गरेका थिए। नेपालले ३७ वर्षपछि घरेलु मैदानमा उपाधि जितेको हो। उपाधिसँगै नेपालले ५ हजार डलर पुरस्कार प्राप्त गरेको छ।

नेपाली खेलाडीको हौसला बढाउन प्रधानमन्त्री केपी ओली दशरथ रंगशाला पुगेका थिए। नेपालको तर्फबाट दुवै गोल हुँदा प्रधानमन्त्री ओलीले उठेर ताली बजाउँदै खेलाडीलाई हौसला प्रदान गरेका थिए। अखिल नेपाल फुटबल संघ (एन्फा)ले पनि विजेता खेलाडीलाई जनही एक लाख पुरस्कार दिने घोषणा गरिसकेको छ।