चितवन – शुक्रबारबाट हल खुल्ने भएसँगै चलचित्रको प्रदर्शन मिति तय हुन शुरु भएका छन् । कोरोना भाइरसका कारण पूर्व निर्धारित मितिमा प्रदर्शन हुन नसकेको चलचित्र ‘लप्पन छप्पन २’ ले नयाँ मिति घोषणा गरेको छ ।
चलचित्र निर्माण युनिटले शिवरात्रीलाई मध्यनजर गर्दै फाल्गुन २७ गतेलाई प्रदर्शन मिति तय गरेको हो । यसअघि यो चलचित्रको वैशाखमा प्रदर्शन मिति तय गरिएको थियो । तर कोरोना भाइरस र लकडाउनका कारण उक्त मितिमा चलचित्र प्रदर्शन हुन सकेन ।
एक्सन र थ्रिलर जनराको यस चलचित्रलाई मुकुन्द भट्टले निर्देशन गरेका हुन् । खिलेन्द्रराज तिमिल्सिना प्रस्तुतकर्ता रहेको चलचित्रमा शिव श्रेष्ठ, सौगात मल्ल, अर्पण थापा, अनुप विक्रम शाही, गोविन्द शाही, प्रकाश कुँवर, दीपक क्षेत्री, राजेन्द्र बिष्ट, शक्ति श्रेष्ठ, सिर्जना सिना, केरोलिन कोलिन्डा लगायतका कलाकारको अभिनय देख्न सकिन्छ ।
सुरज अधिकारी र प्रजापति सिवाकोटी कार्यकारी निर्माता तथा प्रकाश कुँवर, निर्मलकुमार मिश्र, चिजकुमार श्रेष्ठ, सुदिपचन्द्र भक्रेल, सन्तोषचन्द्र भक्रेल निर्माताको रुपमा रहेको चलचित्रमा सुनिल नेउरे र अमित शर्माको पटकथा तथा संवाद छ । चलचित्रमा पुरुषोत्तम प्रधानको सिनेमाटोग्राफी, शम्भुजित बाँस्कोटा, राजेन्द्र भट्ट, दीपक आरजे र बुलेट फ्लेटको संगीत, नरेशनाथ योगीको कोरियोग्राफी, हिमाल केसीको द्धन्द निर्देशन र मिलन श्रेष्ठको सम्पादन छ ।
