फाटी चम्किदा बार्सिलोनाको सानदार सुरुवात

एजेन्सी – स्पेनिस ला लिगामा बार्सिलोनाले सानदार सुरुवात गरेको छ । सिजनको आफ्नो पहिलो खेलमा भिल्लारियलमाथि ४-० को जित निकाल्दै बार्सिलोनाले सानदार सुरुवात गरेको हो ।

घरेलु मैदानमा बार्सिलोनालाई सहज जित दिलाउन युवा स्टार अन्सु माने फाटीले सानदार प्रदर्शन गरे । उनले बार्सिलोनाका लागि २ गोल गरे । यस्तै कप्तान लियोनल मेस्सीले एक गोल गरे भने अर्को एक गोल बार्सिलोनाले उपहार पाएको थियो ।

बार्सिलोनाले खेलको १५ औं मिनेटमा फाटीको गोलबाट अग्रता लिएको थियो । उनले जोर्डी अल्बा पासलाई सदुपयोग गर्दै सुन्दर गोल गरे । लगत्तै ४ मिनेट बित्न नपाउदै फाटीले बार्सिलोनाको अग्रता दोब्बर बनाए । १९ औं मिनेटमा फिलिपे कौटिन्होको पासमा ब्यक्तिगत दोस्रो गोल गर्दै फाटीले बार्सिलोनालाई २-० को अग्रता दिलाए ।

खेलको ३५ औं मिनेटमा बार्सिलोनाले पेनाल्टी पायो । भिल्लारियलका डिफेन्डर मारियो गास्परले फाटीलाई डिबक्स भित्र लडाएपछि रेफ्रीले बार्सिलोनालाई पेनाल्टी दिए । प्राप्त अवसरलाई मेस्सीले गोलमा परिणत गर्दै क्लबको अग्रता ३-० मा पुर्‍याए । पहिलो हाफको इन्जुरी समयमा पोउ टोरेसले आत्मघाती गोल गरेपछि बार्सिलोनाले ४–० को अग्रता लियो । दोस्रो हाफमा कुनै गोल भएन र बार्सिलोना ४-० ले बिजयी भयो ।