भारतमा कोरोना संक्रमितको संख्या चीनको भन्दा बढी
भारतमा कोरोना भाइरस (कोभिड-१९) बाट संक्रमित हुनेको संख्याको चीनको भन्दा धेरै भएको छ ।
भारतमा कोरोना संक्रमितको संख्या ८५ हजार नौ सय ४० पुगेको छ भने चीनमा संक्रमितको संख्या ८२ हजार नौ सय ४१ पुगेको छ ।
भारतको स्वास्थ्य मन्त्रालयको तथ्यांक अनुसार पछिल्लो २४ घण्टामा भारतमा तीन हजार नौ सय ७० नयाँ संक्रमित थपिएका हुन् । भारतमा कोरोना भाइरसबाट पछिल्लो २४ घण्टामा एक सय तीन जनाको ज्यान गएको छ । यससँगै भारतमा कोरोना भाइरसबाट मृत्यु हुनेको संख्या पनि दुई हजार सात सय ५३ पुगेको छ । अहिलेसम्म भारतमा ३० हजार एक सय ५८ जना संक्रमित निको भएर घर फर्किएका छन् ।
भारतको सबैभन्दा प्रभावित राज्य महाराष्ट्रमा अहिलेसम्म कोरोना भाइरसबाट संक्रमित हुनेको संख्या २९ हजार एक सय पुगेको छ । महाराष्ट्रमा अहिलेसम्म एक हजार ६८ जनाको कोरोना भाइरसको कारण ज्यान गईसकेको छ । त्यस्तै गुजरातमा अहिलेसम्म नौ हजार नौ सय ३१ संक्रमित पुगेका छन् । यो राज्यमा मृत्यु हुनेको संख्या पनि ६ सय ६ पुगेको छ । भारतको मध्य प्रदेशमा संक्रमितको संख्या चार हजार पाँच सय ९५ संक्रमित फेला परेका छन् । यो राज्यमा दुई सय ३९ जनाको मृत्यु भइसकेको छ ।
भारतको पश्चिम बंगालमा कोरोनाको कारण मृत्यु हुनेको संख्या दुई सय २५ पुगेको छ भने दुई हजार चार सय ६१ संक्रमित रहेका छन् । उत्तर प्रदेशमा पनि संक्रमित संख्या चार हजार ५७ पुगेको छ । उत्तर प्रदेशमा अहिलेसम्म कोरोना भाइरसबाट ९५ जनाको मृत्यु भएको छ । बिहारमा एक हजार १८ संक्रमित पुग्दा सात जनाको मृत्यु भइसकेको छ ।
संबन्धित समाचारहरु
तपाइँको प्रतिक्रिया